Footballer zingah Neymar a hlu ber!

CIES Football Observatory chuan Europe-a footballer hlu ber a chhutna aṭanga an chhut chhuah an tarlang a, pound maktaduai 216 man hu nia tarlan Barcelona forward Neymar chu Europe-a player inlan zinga hlu ber a ni.

Brazil captain hian Europe-a player hlu ber dinhmun luah tur hian Barcelona lama a khelpui Lionel Messi a khum a, Argentina captain hian pahnihna dinhmun luahin a hlut zawng chu pound maktaduai 149-a chhut a ni. CIES Football Observatory hnuaia mithiam rualte chuan Europe-a player hlu ber thlang chhuak tur hian an khelh ṭhat dan, an nungchang, kum zat leh contract rei zawng aṭangin player hlut dan hi an chhut.

Khawvela player manto ber pound maktaduai 89 man Paul Pogba chuan pathumna dinhmun luahin Manchester United midfielder hlut zawng hi pound maktaduai 136-ah chhut a ni a, palina pound maktaduai 132-a hlu nia ngai Antoine Griezmann nen an inthlau lo hle.

Ballon d'Or dawng hlim leh FIFA best player-a thlan hlim Cristiano Ronaldo chu top ten-ah lang phakin pasarihna dinhmun a luah a, Real Madrid forward hlut zawng hi pound maktaduai 111 nia chhutsak a ni. Premier League player zingah Pogba bakah Harry Kane, Dele Alli leh Eden Hazard te an lang bawk.

Tottenham Hotspur striker Kane hi pound maktaduai 122 hnu nia chhut niin parukna a ni a, Spurs tana a khelhpui Dele Alli hlut zawng chu pound makta­duai 96-a chhut niin pakuana a ni thung. Chelsea innghahna Eden Hazard chu 10-na niin pound maktaduai 89 nen a hlutna in anga chhut a ni.

MSN zingah Luis Suarez chu a hniam ber niin Uruguayan striker hian pangana dinhmun erawh a luah tho a, Liverpool striker hlui hlut zawng hi pound maktaduai 127 ni tura ngaih a ni. Serie A lam aṭangin Paulo Dybala a lang nawlh bawk a, Juventus striker ṭhangduang tak hi pariatnaah dah niin a hlut zawng chu pound maktaduai 99.9 niin an chhut.

Real Madrid forward Gareth Bale chu 14-naah a lang pha ṭawk a, pound maktaduai 85.3-a Real-in kum 2013-a an lei hi a hlut zawng chu pound maktaduai 73.8 a chhut sak a ni - Real-in an leina ai khan a tlawm zawk! Premier League-in top 100-ah player 42 tehmeuh an thawh a, Manchester United forward Anthony Martial (£81m), Manchester City winger Raheem Sterling (£75m) leh Leicester City striker Jamie Vardy (£45m) te chu player langsar an ni.