Kerber a chak hram

Champion lai Ange­lique Kerber chuan Aus­tra­lian Open-a a match hmasa berah fiahna hautak a hmachhawn nghal. Thawhṭanni zan khan Kerber hian first round-ah Lesia Tsurenko-a hmachhawn a, inkhel hautakah 6-2, 5-7, 6-2 in hnehna a chang hram.

Rod Laver Arena-a in­khelah German nula hian harsa lo taka set hmasa ber a lak hnuah set hnihnaah pawh 5-3 in hma a hruai a, mahse game thum a zawna a lak loh hnuah set a hloh zui bawk. Nikum khan Kerber hian a match hmasa berah a khingpuiin match point a hmuh tawh chu pawtthlain champion thei khawpin a khel

ṭha zui a, kuminah pawh kawng awlsam a zawh dawn lo tih a chiang.

Kum 28-a upa Kerber chuan, "Grand Slam no­mawi ka chawi hmasak berna hmunah ka inlan leh a ni a, inelna lianah chuan first round hi a awlsam ngai lo. He hmuna ka in­khel leh thei hi ka lawm a, second round ka luh theih avangin beiseina pawh ka nei sang," tiin a sawi.

Serena nge nge

Grand Slam vawi 22 champion tawh Serena Williams chuan first round paltlang turin harsatna a nei lo. Melbourne Park-a inkhelah Serena hian darkar khat leh minute 19 chhungin Swiss tleirawl Belinda Bencic chu 6-4, 6-3 in a hneh.

American star Serena chuan, "Ka tan chuan hloh leh chuan tur dang a awm chuang lo. Ka inkhelh apiang hi nuam ka ti em em a, khawvel pumah ka theih tawpin tennis ka khel kual tawh, record hi ka ngaihtuah ber a ni lo," a ti. Serena hi a champion a nih chuan major tiltle vawi 22 la tawh Steffi Graf kalsanin Open Era bika Grand Slam champion hnem ber a ni ang.

World number 2 Serena hian second round-ah chuan Lucie Safarova a hmachhawn leh ang. Kum 29-a upa Safarova'n a match hmasa berah thil mak a thlentir.

Czech nula Safarova hian Yanina Wickmayer-i'n match point vawi kua ngawt a hmuh tawh chu 3-6, 7-6 (9-7), 6-1 in a pawt­­thla leh thei a ni. Serena paltlang tur chuan hmasawn a ngai hle tih chiang.

First round inkhel dangah French Open cham­pion Garbine Mu­gu­ruza chuan Marina Era­kovic 7-5, 6-4 in a hneh a, Olympic champion Mo­nica Puig, Jelena Jankovic leh Svet­lana Kuz­netsova te pawhin hnehna an chang ve bawk.