Real Madrid tan thawhlehna hun

A zawna match 40 chhung zet hneh loh nei loa an kal tluan hnuah Real Madrid-in an match hnuhnung berah Sevilla 2-1 in an hneh lo. Zinedine Zidane-a naute hian zanin dar 1:45 hian Copa del Rey quarterfinal first leg khel turin Celta Vigo an lo mikhual dawn a, La Liga hmahruaitu hian thawhlehna hun ṭha an nei dawn tihna a ni ang.

Copa del Rey hi kum 1903 aṭanga khelh ṭan tawh niin vawi 28 champion tawh Barcelona chu record nei ṭha ber an ni. Real Madrid hi vawi 19 an champion tawh thung.

France manager Zidane-a'n Sevilla an hneh loh hnuah an insiamṭhat tur thu a sawi a, league nomawi chawi chu an thil tum pawimawh ni mah se Copa del Rey an ngaihthah loh thu a sawi tel bawk.

Real Madrid hian La Liga match 17 an khelh tawh aṭangin point 40 hmuin hmahruaitu an ni mek a, an hnuaiah hian Valencia (39 points) leh Bar­celona (38) te an awm. Celta Vigo hian an league match hnuhnung berah Alaves 1-0 a hnehin point 27 an nei tawh thung a, pariatna an ni mek.

Celta Vigo hi khingpui nem tak an ni dawn lo! Eduardo Berizzo naute hian nikum khan he inelnaah hian Atletico Madrid an lo hneh tawh a, kuminah pawh team hlauhawm zinga mi an ni. Last 16-a an khingpui Valencia chu 6-2 in an hneh thei.

La Liga lamah pawh Celta Vigo hian Barcelona 4-3 in an lo hneh tawh a, club lian lakah an talbuai bik lo tih a chiang. Europa League last 16 lut tawh team tan hian Iago Aspas chu player pawimawh a ni leh ang. Liverpool forward hlui hian a club tan tun season league kal mekah goal 11 a khung der tawh.

Real an chungnung

Santiago Bernabeu hi Celta Vigo tan lenluh chakawmna hmun a ni lo. Tun season-ah league match khel turin an kal tawh a, 2-1 in an tlawm haw. Nikum khan 7-1 zetin an lo mualpho tawh bawk - season hmasa nena khaikhin erawh chuan Celta hian kuminah hma an sawi tih a hriat theih.

Real hian inelna hrang hrang­ah a zawnin Celta hi an hmachhawn hnuhnung vawi rukah an hneh fai vek, goal 21 khungin an lamah goal hnih chiah a lut. Copa del Rey-a an intawn hnuhnung ber chu kum 2013 kha niin first leg-ah Celta hian 2-1 in hnehna an chang a, beiseina sang tak nen Bernabeu pan mah se 4-0 in an tlawm haw thung.