Ivory Coast chak zo lo

Africa Cup of Nations champion lai Ivory Coast chuan an match hmasa berah goal an khung lo. Elephants hian an khing­pui Togo chu goal awm loin an inhnehtawkpui.

Thawhṭanni zan in­khel­ah Ivory Coast tan Jonathan Kodjia goal khung ngei tura ngaih chu Togo goalkeeper Kossi Agassa-a'n a lo dan sak. Hei bakah hian defender Serge Aurier-a'n hnai set sawt aṭangin a tauh over bawk.

England tana match hnih khel tawh Wilfried Zaha chu a vawi khat nan Ivory Coast tan a inlan a, Crystal Palace midfielder hi khelmual chhunga player hmuhnawm ni mah se goal a khung thei bik lo.

Group C inkhel pakhat zawkah DR Congo chuan Junior Kabananga goal khung hmangin Morocco 1-0 in an hneh a, point thum an hlawh chhuak.

Congo hian awlsam takin hnehna an chang lo. Substitute bench aṭanga rawn tlan lut Lomalisa Mutambala chu yellow card vawi hnih hmuh vangin minute 81-naah hnawhchhuah a ni a, defender Gabriel Zakuani chu hliam vangin hun tawp hma minute nga la awmah lakchhuah a ni bawk. Congo hian substitution an siam zawh tawh avangin hun tawp dawnah player pakuain an khelh a ngai hial.

Zirtawpni zanah group C hian an match hnih­na an khel leh dawn a, Ivory Coast leh Congo te inhmachhawnin Morocco leh Togo te an inkhel zui ve bawk ang.