Matip a chawl rei mai thei

Liverpool chuan Came­roon tan Africa Cup of Nations a khelh duh loh avanga dinhmun chiang lo mek defender Joel Ma­tip chu match ruk dang an la chhawr thei lo mai thei. Reds tan tun season-a match 14 khel tawh hian AFCON khel tur pre­liminary squad an puang aṭangin ram tan a inlan loh tur thu a sawi a, final squad-ah koh a ni ta lo a ni.

FIFA chuan Cameroon phalna thlap lo chuan Matip chuan AFCON-a Cameroon dam chhung chu Reds kawr hain khelmual a luh theih loh thu an sawi a, Matip-a te ram hian February 5-a khelh tur AFCON final an lut hlauh a nih phei chuan Liverpool hian February 11-a Tottenham Hotspur an mikhual hma chu Schalke defender hi an chhawr thei lo ang.

Pathianni zan khan Liverpool-in FIFA aṭanga document ṭul ang an neih loh avangin Manchester United hmachhawn thei squad aṭangin Matip hi an lo hnukdawk tawh. Reds manager Jurgen Klopp chuan United nen an inhnehtawk zawh hnu lawk khan, "Keinin kan lo hriat ve dan chuan Matip hian international football a chawlhsan tawh a, hei hi tihchian tumin theihtawp chhuah mah ila kan club tan a khelh theih dawn leh dawn loh kha 100% a tihchianna engmah a awm si lo a ni," tiin a sawi a, an buaina chu a tih lunghnur takzet thu a sawi bawk.