East Bengal leh Bengaluru fiahna
Kolkata club lian East Bengal-in Lalrindika Ralte captain-na hnuaiah Inrinni khan tun season-a a vawi khat nan hnehna an chang a, khualmualah DSK Shivajians 2-1 in an hneh hram. Vawiin tlai dar li hian Goa khaw lumah Red & Yellow Brigade hian Churchill Brothers an lenchilh leh dawn a, point thum hmuh a awlsam dawn lo.
Bengaluru-in Sree Kanteerava Stadium-ah zanin dar 7:00 hian Mumbai FC an mikhual dawn a, Santosh Kashyap-a hote hi champion lai ang thoa point ruk hmu tawh an nih avangin Blues nena an inkhel tur hi a hmuhnawm dawn. Inkhel pahnih hi Ten 2-ah pekchhuah a ni ang.
Captain Didika
East Bengal tan Lunglei tlangval Didika a inlan a nih chuan captain armband a hreng leh dawn a, Aizawl FC an hmachhawn ṭumin inlan lo mah se Tevor Morgan-a hnuaiah player pawimawh a ni tih a hriat theih. Red & Yellow Brigade hi chak zawk ni mah se history aṭangin Goan club hi an mualah hneh an har tih a lang a, hei hi a chhan ber chu khawlum vang a ni.
Churchill Brothers hi AIFF duhsakna chang pha zinga mi an ni a, I League-ah vawi hnih champion tawh mah se tun season erawh kai thar an ni a, player an neih ṭhat tawk loh bakah an la inrem fuh tawk lo. Goan club hian Mohun Bagan leh Mumbai FC lakah point an hmu lo a, an chak lohna zat erawh goal khat ve ve chauh a ni.
East Bengal midfielder Didika chuan, "Churchill hian an match hmasa pahnihah
ṭha takin an khel a, an vanduai vang chauha point hmu lo an ni. Naupang rual an ni a, an tam avangin khelh an harsa dawn a, khaw lum nen point an la hmuh loh bawk avangin point thum hlawh chhuak tur chuan theihtawp chhuah a ngai ang," tiin Vanglaini palai a hrilh.
Blues ngam loh Mumbai?
Bengaluru FC hian season liam ta khan Daniel Lalhlimpuia goal hmangin Mumbai FC 1-0 in an hneh a, hei hi vawi ruk an inkhelh tawha Blues chak vawi khatna a ni. Mumbai FC lam pawh inchhuang thei an ni bik lo a, zanina an khingpui tur hi vawi khat chauh an la hneh. Chumi awmzia chu vawi ruk an inkhelh tawhah vawi li an inhnehtawk tihna a ni.
Mumbai FC coach thar Santosh Kashyap hi defensive game khelh thiam a ni a, Champhai tlangval Lalchhawnkima'n ṭum dang ang bawkin hmun pawimawih a chang ang. Bengaluru FC tana thu hriat nuam chu Mumbai FC-in foreigner pakhatmah an la nei lo tih hi a ni a, hriat hrehawm erawh foreigner tel loin point ruk an hmu tawh.
Bengaluru lamah Lalchhuanmawia leh Lalthuammawia te inhliam vangin an la inlan thei dawn lo a, Chennai City an hneh ṭum ang thoin Mizo pathum Daniel, Sena Ralte leh Malsawmzuala te squad-ah an awm rin a ni. Serchhip tlangval Daniel hi Chennai City nen an intawn ṭumin inkhel bul ṭan mah se amah thlaktu CK Vineeth-a'n goal pawimawh a khung zui avangin Mumbai FC nen bench aṭangin bul a ṭan a rinawm.
Blues left back Sena Ralte chuan, "Royal Wahingdoh-a kan coach hlui Santosh-a hote hmachhawn chu a châkawm tawh khawp mai. Defensive game khelh a thiam a, amaherawhchu kan tlarhmaten an paltlang theih ngei ka ring," tiin chak a inbeisei thu Vanglaini palai a hrilh.