Liverpool tan champion beiseina a tawp?
English football-a season duhawm ber hmangtu ni tura an hming ziah kai tum Liverpool-in harsatna an tawk - Inrinni zan khan Premier League-ah Tottenham Hotspur chu 1-1 in an inhnehtawkpui a, champion beiseina a tlem ta sawt.
Spurs tan forward ṭha mi Son Heung-Min chuan goal hmahruai a khung a, Liverpool-in Luis Diaz hmangin sut mah se goal dang erawh an khung thei tawh lo a, point khata lungawi an zir a ṭul.
Anfield-a hnehna an chan zawh loh avangin Reds hian point 83 chiah an nei ta a, an elpui Manchester City nen an point hmuh zat a inang - City hian match khatin an khel tlem thung.
Nizan khan Manchester City hian Newcastle United an mikhual a, he thu buatsaih a nih lai hian result kan hre hman lo - Pep Guardiola naute hian hnehna an chang a nih chuan point thumin Liverpool an tlansan ang.
Tuma chiang
Spurs coach Antonio Conte-a'n Anfield-a Liverpool pawng tawng nawr chu thil âtthlak a ni tih a hria a, tlarhnungah phui takin a team a rem a, tlarhma nei ṭha Reds-in chet ngaihna an hre lo a ni ber.
Jurgen Klopp-a team hian vawi tam Spurs box chhungah ball an vawrh a, mahse, awmze nei lo a chang zel - London club hian tlarhnung an rem ṭha a ni satliah lo a, counter attack-ah an hlauhawm em em zel bawk.
Minute 56-naah Spurs zawkin goal an khung a, Anfield thawm chu reh tak a ni. Harry Kane-a'n mawi zeta ball a control hnuah hmun awl a insiam a, mahse, goal zawna pet mai loin Ryan Sessegnon a pe.
Kum 21 mi Sessegnon hian goal bula awm Son tan a siamsak zui a, South Korean striker hian tun season Premier League-a a goal 20-na ni turin a khung - Reds tlarhnung an ṭhiah dan a mawi takzet.
Beiseina neitu Diaz
Tlarhnung ven ngai pawimawh Spurs zawkin goal an khung hmasa a, Liverpool fans hrilh a hai. Mahse, champion tum Reds-in mikhual lakah tlawm an tum lo a, minute 74-naah si phurh an sut.
Reds midfielder Thiago Alcantara ball pek chu Diaz-a'n goal-ah a shot a, Spurs midfielder Rodrigo Bentancur chuan lo dang perin goal-ah a lut; 1-1 a ni a, Liverpool an phur sawt.
Merseyside club-in an si phurh an sut hma hian Klopp-a'n Jordan Henderson la chhuakin, a aiah forward Diogo Jota a luhtir a, Liverpool-in goal khung an tum tih a lantir.
Mahse, si phurh an sut hnuah Reds-in goal dang an nei tawh lo - 65% zet ball changin vawi 22 ngawt shot nei mah se an shot zinga pathum chiah goal zawnah a kal a, Liverpool-in chak an phu lo.
Liverpool an bil
Klopp-a'n Champions League semifinal second leg bul ṭan aṭangin Naby Keita leh Diogo Jota a la chhuak tih loh chu player a thlak danglam lo a, player pahnih aiah hian Hendo leh Diaz ten bul an ṭan.
Liverpool fixtures neih dan thlirin Klopp hian player a siksawi nual rin a nih laiin a siksawi mumal lo tlat a, a tawpah inkhel chau player-ten tlarhnung inremphui lutuk lakah ngaihtuahna thar an tlachham ta em ni, tih mai awl a ni. Tlarhmaah Mane leh Salah te an reh a, Spurs tlarhnungin che thei loin an siam.
Salah-a'n goal khung a tum luatah pek awlsam zawk a ṭhiante a hmu lo fo em aw, tih tur a ni a, Egyptian forward hian a hma a sial hret niin a lang. Reds-in defender Virgil van Dijk-a'n bar a tauh per an ui vawng vawng ang a, chutihrual chuan Spurs tan Pierre-Emile Hojbjerg-a'n post a tih per ve tho tih hriat a ṭha.
Reds hian Thawhlehni zanah club legend Steven Gerrard-a enkawl Aston Villa an lenchilh zui dawn a, Inrinni zanah FA Cup final-ah Chelsea nen an intum zui dawn - hmabak a hautak hle.
May 7, Inrinni Zan
Brentford 3 - 0 Southampton
BRE: Pontus Jansson 13'; Yoane Wissa 14'; Kristoffer Ajer 79'
Burnley 1 - 3 Aston Villa
BUR: Maxwel Cornet 90+1'
AST: Danny Ings 7'; Emiliano Buendía 31'; Ollie Watkins 52'
Chelsea 2 - 2 Wolverhampton Wanderers
CHE: Romelu Lukaku 56' (P), 58'
WOL: Francisco Trincão 79'; Conor Coady 90+7'
Crystal Palace 1 - 0 Watford
CRY: Wilfried Zaha 31' (P)
Brighton & Hove Albion 4 - 0 Manchester United
BHA: Moisés Caicedo 15'; Marc Cucurella 49'; Pascal Groß 57'; Leandro Trossard 60'
Liverpool 1 - 1 Tottenham Hotspur
LIV: Luis Diaz 74'
TOT: Son Heung-Min 56'
Kan khelh danah ka lawm a, team ṭha tak, game plan mumal tak nena rawn kal team laka kan rilru puthmangah khan ka lawm a ni. Zanin thil thleng tam tak kha chu a ṭha takzet a, counter press te kha ṭha tak a ni.
Mahse, Spurs-in goal an rawn khung a, chi ai hauh loa kan nawr nat chhunzawm a ngai a, chu chu thil harsa tak a ni - mahse, kan ti thei a, si phurh kan sut tlat. Kan result-ah ka lawm lo a, kan khelh danah erawh ka lawm thung. World class coach leh world class player kawltu an ni a, kar khat zet inpuahchahna an nei bawk a, ni thum dana inkhel reng keini tan chuan a harsa a ni. Kan dressing room a ngui khawp a, mahse, game dang khelh tur a la awm alawm - kan bei zel ang. - Jurgen Klopp, Liverpool manager
Tun ang hun, a bik takin khualmualah lehnghal Liverpool hmachhawn hi thil awlsam a ni lo. Khatiang bengchheng tam tak kara inkhelh kha ka player-te tan chuan a harsa em em a ni - game ṭha tak kan khelh avangin lawm tur kan ni a, tlarhnung kan veng ṭhain tlarhma lamah pawh chance kan insiam thei a ni. Kan chak zawh loh avangin ka player-ten hrehawm an ti a, mahse, chak duhna tak tak lantirin an khel a ni. Kan game a rorum a, insiamṭha turin hun kan mamawh leh ang - keini hmachhawn hi thil awlsam a ni lo. Liverpool hi ni thum dana inkhel an ni a, khati taka an tha a tho thei kha an chhuanawm hle. Mahse, ka player-te pawh an tha a za a, Champions League khelh kan la beisei avangin Ningani zana Arsenal nena kan inkhel tur hi a pawimawh hle. - Antonio Conte, Tottenham Hotspur manager