Vawiinah Central YMA Cricket Semifinal Ramhlun Venglai vs Hunthar; Chaltlang vs Durtlang

Central YMA leh Cricket Association of Mizoram buatsaih 11th Inter Branch Cricket Tournament semifinal chu vawiin hian Sihhmuiah khelh a ni dawn. Chawhma dar 9:00-ah champion lai Ramhlun Venglai leh Hunthar an inkhel ang a, chawhnu dar 1:00-ah Chaltlang leh nikum finalist Durtlang te an inkhel ang.

Quarterfinal kha
Cricket khelhna bik atana siam Sihhmuiah quarterfinal aṭangin khelh ṭan a ni a, team ṭha leh player ṭha danglamna a lang. Champion lai Ramhlun Venglaiin harsatna nei loin Zemabawk an hneh a, an khingpui tur Hunthar pawhin awlsam takin Luangmual an hneh leh bawk.

Inrinni khan quarterfinal thawh hnihna khelh a ni a, vawi li champion tawh Chanmari an inlan. Chanmari hian record nei ṭha mah se an match hmasa bera Sihphir an hmachhawn ṭumin an talbuai a, Chatlang lakah erawh an vannei zo tawh lo.

Chanmari hian bat hmasain 102 runs an siam a, Chatlang player Bobby Zothansanga an ngam lo. Bobby hian wicket thum a lak bakah 47 runs a siam zui a, Chatlangin 17.1 overs-ah 103/4 runs siamin wicket rukin hnehna an chang.

Inkhel hnuhnung zawkah Durtlang leh Armed Veng an inkhel a, vawi li final lut tawh Durtlang an chungnung. Champion hmasa ber Armed Veng hian 75 runs chauh an siam a, Durtlangin wicket khat chauh hlohin over 9.3 lekah 79 runs an vaw chhuak a, hnehna an chang.

Semifinal chu
Mizoram chhungah cricket khel tam chho ṭan mah se tih takzeta khel erawh an la tam lo a, hemi a nih avang hian inelna hnuhnung pahniha final-a a inhmachhawn Ramhlun Venglai leh Durtlang te bawk hi tun ṭum final-a inhmachhawn tura ngaih an ni.

Chutihrualin infiamnaah chuan thilmak a thlen chang a awm a, 2007 finalist Chaltlang leh final la khel ngai lo Hunthar ten thilmak thlentir an tum dawn. Hunthar tan Luangmual Cricket Club-a khel opener B. Lalnunfela leh a kawppui Chaltlang CC-a khel Lalrinmawia Kawlni te an pawimawh dawn a, Mizoram team-a leg spinner Moses Ramhlunmawia an kawl. Amaherawhchu match hnuhnung bera man of the match F. Malsawmtluanga chu National Cricket Academy-a training tura koh a nih dawn avangin a tel dawn lo - channa lian tak a ni.

Durtlang hi Chatlang lakah buk rit zawk ni mah se semifinal pahniha intum tawk tur zawkah a ngaih theih. Chaltlang hian Chanmarians captain leh Mizoram vice captain Bobby an kawl a, anni Mizoram off spinner ṭha ber zinga mi a ni. Chutihrualin Durtlang hian Bobby-a hmachhawn thei tur veteran player K. Vanalruata leh Mizoram opener Lalhruaizela te an kawl avangin rinkai zawk an ni a, chak chiang tiha sawi theih erawh an ni lo.