Man United tan mualphona vawrtawp

Manchester United chu Inrinni zan khan Brighton & Hove Albion lakah 4-0 in an tlawm a, season tharah Champions League an khel dawn lo. An dinhmun aiin an khelh dan pawm thiam a har a, Man United ṭantuten pawhin, "Man United kawr ha tlakin ni lo," tiin an au rual.

Amex Stadium-ah Brighton tan Moises Caicedo, Marc Cucurella, Pascal Gross leh Leandro Trossard ten goal khat ṭheuh an khung a, Cristiano Ronaldo telna Man United-in an chhanletna an nei lo.

Goal li chauh!
Man United-in Seagulls lakah goal li an chhuah a, goal tam zawk chhuah thei an nihna lai hi mualphona belchhahna chu a ni. Ralf Rangnick-a hoten tan Champions League khelh a beiseiawm tawh lo a, chutihrualin an zahawmna humhim nan an khelh hmabaka chak a ṭul.

Amaherawhchu Man United-in an zahawmna humhim turin khelmualah an theihna an lantir thei lo a, an thiam an theihnghilh a, khelh dan hmang an nei lo - enkawltu nei lo ang hial an ni.

Seagulls-in Man United player-te an kat kual hnuah Moises Caicedo-a'n mawi zetin box pawn aṭangin goal kilah a pet lut a, mualphona hmahruai a ni. First half tawp hmain keeper Robert Sánchez-a'n ball pet chhuah chu Raphael Varane-a'n la thla sualin Danny Welbeck-a'n goal chiang sa tura ngaihah a hlah.

Halftime-ah thu ṭha inhrilhna hun awm mah se second half-ah Rangnick-a hote an buai sawt. Minute 49-naah Brighton-in chiang takin United tlarhnung an ṭhiat a, Cucurella-a'n ṭha zetin a pet goal.

Seagulls an phur zel a, Pasal Gross-a'n nuam sa takin Victor Lindelof leh Varane te kara khalh lutin minute 57-naah a khung. Man United player-ten Brighton player-te ball in pass kual lai an thlir a, Welbeck-a shot-cross chu goalline aṭangin Diogo Dalot-a'n pet chhuah tum mah se Leandro Trossard perin goal-ah a lut.

Man United-in goal dang an chhuah belh loh avangin an vanduai a, Dalot-a'n anmahni lam goal ban a tih per bakah Welbeck-a'n a club hlui lakah a khung teuh hle. Chutihrualin Man United tana Edinson Cavani goal khung erawh offside vangin pawm a ni lo.

Mualphona chu
Man United-in Seagulls an hneh loh avangin chhiarkawp dan thlapin season tharah Champions League an khel dawn lo tih a chiang a, Premier League season khata point an hmuh tlem ber ṭum a ni dawn tih a chiang bawk.

Tun season-ah Man United hian goal 56 an chhuah tawh a, Premier League-a goal an chhuah tam ber ṭum a ni. Liverpool leh Man City lakah Man United hi an mualpho tawh a, an khingpuite an ṭhat avangin hriatthiam theihna chin a awm. Tun ṭuma an hneh loh erawh Seagulls an ni a, Man United hi season khata Seagulls leh Watford laka goal li chhuah ve ve thei awmchhun an ni.

Man United ṭantute pawhin player-te an dim tawh bik lo a, "Man United kawr ha tlakin ni lo," tiin an au rual nghal. Bruno Fernandes pawhin, "Keimah tiamin kan khelh dan kha Man United kawr ha turin a ṭha tawk lo a, min ṭantute thlirna kha ka pawm," tiin a sawi a, manager Ralf Rangick leh keeper David de Gea te pawhin ngaihdam an dil.

Khualmualah Man United hi an zawnin match nga chhung an chak lo a, kum 1981 hnua khualmuala an record neih chhiat ber a ni. May 22 hian Man United-in Crystal Palace an hmachhawn ang a, an hneh lo a nih chuan record chhe zawkin a hmuak.

Cristiano Ronaldo pawhin a club khelhna a thlak a nih loh chuan kum 20 chhunga a vawi khat nan Champions League a khel dawn lo. Tun season-a inelna hrang hranga goal 24 khung tawhtu Ronaldo pawhin a hmalam hun chungchangah ngaihtuahna a hman ṭhat a ṭul ang.