Neitu thar hmaah Chelsea chak zo lo

Inrinni khan Chelsea chuan neitu thar an nei tih an puang a, baseball club LA Dodgers neitu zinga mi Todd Boehly leh a thawhpuiten London club nen hian inremna an siam.

Boehly leh a ṭhianten Chelsea inremna an neihpui hnuah Stamford Bridge-a an inkhel an en zui a, mahse, London club hian Wolverhampton Wanderers chu 2-2 in an inhnehtawkpui thei hram.

London club tan Romelu Lukaku-a'n minute 56-naah penalty hmangin goal hmahruai a khung a, minute hnih hnuah an goal hnihna a khung zui - club neitu thar hmaah Chelsea an chak ngei dawn niin a lang hman.

Mahse, Wolves-in ngaihdan dang an nei - bench aṭanga luhtir Francisco Trincao chuan minute 79-naah ṭha zetin si phurh a sut ṭhen a, hun pek belh minute sarihnaah captain Conor Coady chuan si phurh a sut zo zui!

Chelsea an chak zo lo a, season thara Champions League khel ngei tura ngaih tawh team hi an dinhmun a him ta lo sawt - match thum khelh tur an la neihah pangana Tottenham Hotspur aia an sanna chu point nga a ni.

Inkhel entu Boehly leh a thawhpuite an lo lang a, an hlim lo tih inhrilh nawn a ngai lo - anni hian pound tluklehdingawn 4.25-in Chelsea hi an lei.

Chelsea leina aṭanga £2.5tld chu London club leina man ngawr ngawr a ni a, a bak £1.75tld chu Stamford Bridge, club academy, women's team leh Kingsmeadow (U23 leh hmeichhe team khelmual) thuam chak nan an hmang dawn thung a, Chelsea Foundation lamah an insen chhunzawm bawk ang.

Boehly hi a meizang-hlaptu ber ni mah se Clearlake Capital, US mi hausa Mark Walter, Swiss sumdawng hausa Hansjoerg Wyss, American PR executive Barbara Charone, British sumdawng Jonathan Goldstein leh British journalist Daniel Finkelstein te chu a thawhpuite an ni.

London club hralhna aṭanga hlawkna awm ang chu Roman Abramovich-a'n a lo sawi tawh angin midang ṭanpuina atan hman a ni dawn a ni.