Nadal leh Djokovic hneh thei Alcaraz

Tennis player chhuak thar, a bik takin clay court-a inkhel thiam em em a awm - a hming chu Carlos Alcaraz a ni. Spanish rawlthar hian Madrid Open khelh laiah Rafael Nadal leh Novak Djokovic te a hneh.

Kum 19 mi Alcaraz hian season duhawm a hmang mek, amah ang bawka Spanish player Nadal hnung a zui chho zel. Madrid Open vawi nga champion tawh Nadal hi quarterfinal-ah 6-2, 1-6, 6-3 in a vaw tla.

Semifinal-ah world number 1 Novak Djokovic a hmchhawn zui a, player ṭha leh ropui lakah a zam chuang lo. Serbian star hi 6-7 (5-7), 7-5, 7-6 (7-5) a hnehin final a lut, nizan khan Alexander Zverev nen nomawi inchuhin result kan hre hman lo.

Grand Slam vawi 21 champion tawh Nadal bakah, major title 20 la tawh Djokovic te clay court-ah a zawna hneh thei hmasa ber chu Alcaraz a ni ta a, thla hmasa lawka Miami Masters champion ni bawk hian hmabak a nei êng hle.

Semifinal inkhel dangah Zverev chuan Stefanos Tsitsipas lakah 6-4, 3-6, 6-2 in hnehna a chang a, clay court bikah Greek tlangval a hneh vawi khatna niin, a nomawi kawl lai humhim theih ngei a inbeisei.