Golden State Warriors an chak chiang

Stephen Curry, Jordan Poole leh Klay Thompson te pathum point neih belhkahwm chu 78 zet a ni. Golden State Warriors chuan Memphis Grizzlies lakah 142-112 in hnehna an chang a, Western Conference semifinal series-ah 2-1 in hma an hruai.

Chase Center, San Francisco-a inkhelah Curry-a'n point 30 a nei a, a ṭhiante pahnih Poole (27 points) leh Thompson (21) te an che ṭha bawk. Curry hian tun playoff chinah vawi li zet chu match khatah point 30 nei tlin a nei tawh.

Grizzlies hian game 2 an la a, game 3-ah erawh quarter hmasa berah chungnung ve mah se a hnuhnung pathumah an hnufual hle. Ja Morant-a'n point 34 a nei a, player dang zingah point 20 nei tling an awm lo.

Chak lo mah se Grizzlies coach Taylor Jenkins chuan beisei a la neih thu sawiin, "Match lehpekah chuan tun aia ṭhain kan khelh theih ka beisei, tun ṭumah kha chuan basket nei thei ve tho mah ila keimahni lam kan inveng ṭha tawk lo," tiin a sawi.

Eastern Conference semifinal lamah Milwaukee Bucks chuan Boston Celtics 103-101 in an hneh hram. NBA champion lai tan Giannis Antetokounmpo-a'n point 42 a nei a, a team hi series-ah 2-1 in hma a hruaipui.

Celtics hi ropui takin an tho chhuak dawn niin a lang hman. Point 13 zeta an hniam hnuah an pawtthla a, minute khat leh second 49 chauh a awm tawh chuan point khatin an sang zawk! In veng tlang thei se chuan series hmahruaitu an ni dawn.

Mahse, hun tawp dawn tak takah Antetokounmpo leh Jrue Holiday ten point a nei a, hun pawimawh laia che fuh zawk Bucks an chungnung hrang. Thawhlehni zinga game 4 an khelh tur a hmuhnawm ang.

NBA Playoff
Eastern Conference Semifinal
Game 1: Milwaukee Bucks 101 - 89 Boston Celtics
Game 2: Boston Celtics 109 - 86 Milwaukee Bucks
Game 3: Milwaukee Bucks 103 - 101 Boston Celtics
May 10, Thawhlehni
Game 4: Milwaukee Bucks 05:00 AM Boston Celtics
(Bucks hian series-ah 1-1 in hma an hruai mek)

Western Conference Semifinal
Game 1: Golden State Warriors 117 - 116 Memphis Grizzlies
Game 2: Memphis Grizzlies 106 - 101 Golden State Warriors
Game 3: Golden State Warriors 142 - 112 Memphis Grizzlies
May 10, Thawhlehni
Game 3: Golden State Warriors 07:30 AM Memphis Grizzlies
(Warriors hian series-ah 2-1 in hma an hruai mek)