Champion lai Chhinga Veng an chak lo

Tualchhung volleyball inelna lian ber Pro Volleyball League khelh ṭan a ni a, match hmasa berah champion lai Chhinga Veng chu season hmasa final-a an hneh tak Durtlang North lakah 3-2 in an chak lo.

R. Dengthuama Indoor Stadium, Mualpuia inkhelah Haryana aṭanga an lak luh Sagar Malik chu Durtlang North chakna hnar a ni. Ani hian point 31 thawk chhuakin, a team hi 25-22, 23-25, 17-25, 25-17, 15-13 in hnehna a chanpui.

Season hmasa final-ah pawh khan team pahnih hi an inkhel tawk viau, set nga an khelh hnuah Spikers an chak. Kuminah erawh result a danglam, D3 Business Player of the Night atana thlan Sagar Malik hoin Durtlang North hian champion an tum ngam ang.

Zaninah Chhinga Veng hi an inlan leh nghal dawn. Mizo hlanga inlan tur awm chhun TNT an hmachhawn ang. May 11, Nilaini zanah Durtlang North-in vawi hnih champion tawh Hunthar an khelhpui ve thung dawn a ni.

Inrinni zan inkhelah Hunthar chuan Aizawl khawpui pawn team awmchhun Tuichangral chu 25-19, 20-25, 25-23, 18-25, 15-6 in an hneh, vawi hnih champion tawh Hunthar lamin inkhel thunun hleithei lo mah se a tawpah an tawnhriat neih ṭhatna a lang.

PVL Results & Fixtures
May 6, Zirtawpni
Durtlang North 3 - 2 Chhinga Veng Spikers
(25-22, 23-25, 17-25, 25-17, 15-13)
D3 Business Player of the Night: Sagar Malik, Durtlang North
May 7, Inrinni
Hunthar 3 - 2 Tuichangral
(25-19, 20-25, 25-23, 18-25, 15-6)
D3 Business Player of the Night: Sahil Kumar, Tuichangral
Zanin Inkhel Tur - Mipa
Chhinga Veng 08:00 PM TNT
May 11, Nilaini
Durtlang North 08:00 PM Hunthar
May 12, Ningani
Tuichangral 08:00 PM TNT
Hmeichhia
May 10, Thawhlehni
Durtlang 03:00 PM Kanan
Bethlehem VT 08:00 PM Bungkawn
May 13, Zirtawpni
Kanan 03:00 PM Bethlehem VT
Bungkawn 08:00 PM Durtlang