Mangṭha Watford & Roy Hodgson

Crystal Palace chuan Inrinni zan khan 1-0 in Watford an hneh a, an coach hlui Roy Hodgson-a enkawl team hi Championship lama inkhel turin an thawn thla.

Palace tan hian Wilfried Zaha chuan penalty aṭangin goal awmchhun a khung a, him tura chak mamawh Watford-in a chhanletna tur an neih loh avangin an tla.

Premier League aṭangin Watford bakah Norwich City an tla tawh a, team pakhat an la tla dawn - Burnley, Leeds United leh Everton chu la tla thei vek an ni.

Burnley hian Inrinni zan khan Aston Villa chu 3-1 in an ngam lo a, Villa tan hian Danny Ings, Emiliano Buendia leh Ollie Watkins ten goal khat ṭheuh an khung - Burnley tana Maxwel Cornet goal khungin awmzia a nei phak lo.

Watford an tla
Season hmasa Championship-a pahnihna ni chungin Premier League-ah Watford an lo kir a, mahse, an tla lehnghal - kar hmasa khan Burnley lakah 2-1 in an tlawm a, hei vang hian him turin an hmabak match liah tlawm a thiang tawh lo.

Mahse, Palace khelmualah Watford an hnufual a, inkhel ṭantir aṭangin mualneitu team an hlauhawm zawk - minute 31-naah defender Hassane Kamara chuan penalty a chawi a, Michael Olise ball tauh chu a kutin a lo dang.

Penalty pet turin Zaha a lo pen chhuak a, Ivory Coast international hian harsatna nei loin goal-ah a chantir. Watford-in an nawr let hleithei lo a, Palace-in goal dang khung lo mah se an khelh dan aṭangin chak tur zawk rin lawk a harsa lo.

Watford buaina belhchhah turin penalty a chawi ṭuma yellow card pek tawh Kamara chuan minute 68-naah a yellow card pahnihna a hmu a, hnawhchhuah a ni. Watford an tlawm a, season thara Premier League club enkawl a tum tawh loh thu sawitu Hodgson hoin Watford an tla.

Burnley an him lo
Aston Villa-in mikhual tlangnel zia an chhuah a, khualmualah Burnley chu harsatna nei loin 3-1 in an hneh - Steven Gerrard-a enkawl team tan top 10-a season khar turin dinhmun a ṭha sawt a, Burnley erawh tla mai thei dinhmunah an ding leh ta.

Premier League-a an match hnuhnung pathumah Burnley-in Southampton (2-0), Wolverhampton Wanderers (1-0) leh Watford (2-1) an hneh a, English top flight league-a inhamtan beiseina a nung thar.

Mahse, Villa-in Burnley lakah zahngaihna an lantir lo - minute sarihna aṭangin goal an khung ṭan a, Ings chuan a club hlui lamah hian goal hmahruai a khung a, Buendía leh Watkins ten an belhchhah ve leh bawk.

Burnley tan hun pek belh minute khatnaah Cornet chuan khung ve mah se scoreline timawitu bak a tling zo lo a, Burnley an tlawm chiang. Mahse, Burnley coach lailawk Mike Jackson chuan, "Tunah hian league a la tawp lo," a ti a, him tura theihtawp an chhuah chhunzawm tur thu a sawi.