Gokulam Kerala tan nomawi?

I League-ah champion lai Gokulam Kerala chuan Inrinni zan khan Rajasthan FC 1-0 in an hneh a, chhiarkawp dan chauhin an champion tawh lo.

Kerala club hian Sreenidi Deccan leh Mohammedan te an la hmachhawn dawn a, chak lo ve ve pawh ni se anmahni hnaih bertu Mohammedan aia point ruka an san bakah, goal difference-ah goal 15 ngawt a an tam zawk avangin nomawi an humhim ngei dawn niin a lang.

Naihati Stadium-ah Gokulam tan Jourdaine Fletcher chuan minute 27-naah goal awmchhun a khung. Kerala club hian tun season-ah chak loh an la nei lo a, match 16 an inkhelh tawh aṭangin vawi 12 chakin vawi li an inhnehtawk.

Inkhel dangah Moham-medan chuan Zirtawpni zan khan Churchill Brothers 2-0 in an hneh a, goal hnih hi Marcus Joseph-a khung ve ve a ni. Inelna hi Kolkata-ah khelh a nih avangin Mohammedan tan mahni ram ngeia champion theihna remchang a awm a, amaherawhchu an elpui Gokulam an chetsual meuh loh avangin beiseina a thamralah a ngaih theih.