Madrid Open champion Jabeur

Ons Jabeur chuan Jessica Pegula hnehin Madrid Open champion a ni. Tunisia player hian African nula zingah WTA 1000 event huanga champion thei hmasa ber record a siam.

Kum 27 mi Jabeur hi Inrinni zan final inkhelah a hnufual hman viau, set hnihna bikah phei chuan game a la miah lo! Mahse, a khingpui American nula lakah tho chhuakin 7-5, 0-6, 6-2 in hnehna a chang.

Tun kara world ranking chhuak tharah chuan a sang zual 10 zingah a tel phak dawn, Arab player - mipa leh hmeichhe zingah pawh world number 1 chin ni thei hmasa ber a ni dawn bawk, an khawmualpui tan sulsutu pawimawh a ni.

Tun dinhmuna world number 12 Pegula chuan, "Rin harsa ka ti hle mai, tun hma aṭanga ka duhthusam chu ni mah se a taka a rawn thlen chuan awih a harsa. Tunah chuan Masters 1000 title ka nei ve ta.

"Clay court-a hnehna ka chan hrang hrangte hian inrintawkna min siamsak, ranking chu pawimawh tho mah se ka ngaih pawimawh zawk erawh ṭha taka match khelh hmasak a ni," tiin a sawi.

Tun thla chawhnu lam aṭangin French Open an khel dawn, clay court inelna lian hmachhawn turin inbuatsaihna a nei ṭha. Paris khawpui a pan hma hian Rome Open khelh leh phawt a tum.