Team huaisen Inter an tho chhuak

Serie A champion lai Inter Milan chuan goal hnih an phurh hmasak hnuah Empoli an lehthal. Hnehna an chan theih nan Lautaro Martinez-a'n goal hnih a khung a, a tira hniam zawk kha a tawpah 4-2 in an chak.

Zirtawpni zan San Siro-a inkhelah Empoli lamin Andrea Pinamonti leh Kristjan Asllani te hmangin goal an nei hmasa, minute 28-na lekah mikhual team lamin 2-0 in hma an hruai fel hman der.

Anmahni mualah ngei Inter an tlawm chiang dawn hle niin a lang hman, mahse champion zia an chhuah. Na takin an nawr let, Simone Romagnoli chuan anmahni lama a tih luh bakah Martinez-a'n a sut zo, chawlhlawk hmain 2-2 a ni leh hman.

Nerazzurri hian second half-ah Martinez hmanga hma an hruai bakah, hun tawp dawnah Alexis Sanchez chuan chak a nemnghet bawk, point thum an hlawhchhuah avangin an elpui AC Milan an tlan pel leh rih.

Nizan khan AC Milan chu Verona mualah an lenglut a, hnehna an chang a nih chuan Milan hian Inter tlan pelin hma an hruai leh nghal ang.

Inkhel dangah Juventus chu Genoa mualah 2-1 in an chak lo. Old Lady hi chak lo mah se palina an ni phak dawn tih a chiang tawh. Serie A aṭang hian Inter, Milan, Napoli leh Juve te hian Champions League an khel dawn tih a chiang tawh.