Barca-in UCL hmun an nemnghet

Barcelona chuan season tharah Champions League an khel dawn tih an nemnghet. Catalan club hian hun tawp dawna Jordi Alba goal hmangin Real Betis 2-1 in an hneh hram a, khelh hmabak pathum la awm mah se palina aia hniamah an awm thei tawh lo.

Inkhel ṭan hmain Barcelona hian an khingpui tur hi zahna chibai (guard of honour) an buk. Real Betis hian tun hnai khan Valencia hnehin Copa del Rey nomawi an chawi a, an phu ang ngeia chawimawi an hlawh.

Xavi nauten goal khung an harsat, second half tawp lamah Ansu Fati dah luh a ni. Lionel Messi-a jersey number 10 rochuntu hian khelmual a luh aṭanga minute khat hnu lekah goal a khung nghal, a hliam na tak kha a dam fel tawh.

Mahse, Barca lawmna au rawl a reh hmain an defender hlui Marc Bartra chuan si phurh sutna a tauh lut. A tawpah erawh Alba-a'n laklawh nei miah loin ball kang lai a hlap lut a, an phu ang ngeiin point thum an hlawh chhuak.

La Liga pahnihna Barcelona hian point 69 an hmu, pangana Betis ai hian point 11 zetin an sang fal tawh. Real Madrid umphak thei tawh lo mah se, pahnihna ni chunga season an khar thei a nih chuan an tan thil ṭha a ni ang.

Nikum November thla khan Xavi hian Ronald Koeman a thlak, hetihlai hian La Liga-ah pakuana an ni. A tirah che fuh nghal vek bik lo mah se hma an sawn zel, season tharah chuan Real Madrid el phak nih leh an tum dawn.