Roger Federer a la thiam reng

Khawvel tennis player piang tawh zinga thiam berte zinga mi Roger Federer-a'n a thiam a la theihnghilh lo. Grand Slam nomawi ringawt pawh 17 zet kawl tawhtu hian nimin khan Australian Open second round khelin Noah Rubin a hneh.

Melbourne Park-a inkhelah Swiss tiampuipa hian American tlangval Rubin lakah hian 7-5, 6-3, 7-6 (7-3) in hnehna a chang. Kum 35-a upa Federer hi set thumna hloh thei dinhmunah a ding hman, a khingpui Rubin-a'n set point vawi hnih a hmuh tawh chu pawtthla lehin straight set-in hnehna a chang.

Kum 35-a upa Federer hian Australian Open nomawi vawi li a chawi tawh a, Asia aṭanga Grand Slam tournament awmchhunah hian vawi 18 a inlanna niin hengah te hian third round a lut vek. Swiss tennis player hian third round-ah chuan Tomas Berdych a hmachhawn leh ang, 2010 Wimbledon finalist Berdych hian 6-3, 7-6(6), 6-2 in Ryan Harrison a lo hneh ve bawk a ni.

Third round thlirin Federer chuan, "Inkhel hautak a ni dawn, tun hmain Berdych hian New York, Wimbledon leh Olympic-ah te min lo hneh tawh a, tun

ṭumah pawh chak zawk nih leh ngei a tum ang. Kei pawhin hnehna chan ngei tumin ka khel leh dawn a, inkhel hmuhnawm leh en manhla tak a ni ang," a ti.

Season hmasa khan Federer hi hliamin a ti buai fo. Kumtir lamah a hnungzâng a hliam a, Wimbledon semifinal-ah a khup a hliam leh bawk. A khup hi zai a nih avangin season chawhnu lam zawng a inkhel thei lo a, tun ṭumah hian seeded 17-na daih a nih phah - final kalkawngah player ṭha tam zawk an awm dawn tihna a ni.

Thlirna
Darkar hnih leh minute thum an inkhelh chhungin Federer hian feet 5 leh inches 10 a sang Rubin lakah vawi 17 ngawt aces a siam thei a, tunhma lam aṭanga a lo chak pui ṭhin a service chu in­nghahna tlak a la ni tih a chiang.

Attacking game khel ṭhin Federer hian second round in­khelah hian vawi 41 zet un­forced errors a nei a, a khingpui hian

ṭum 27 a nei thung. Kum 2010 hnua a vawi khat nan champion a tum a nih chuan Federer hian a tihsual tam tak hi a siam ṭhat a ṭul - Andy Murray leh Novak Djokovic te lakah unforced errors nei ṭeuh chung chuan hnehna chan harsat zia hrechiangtu a ni.

Inkhel dang
Seeded pangana Kei Nishikori chuan Jeremy Chardy chu darkar hnih leh minute ruk chhunga 6-3, 6-4, 6-3 a hnehin third round a lut a, a match lehpekah chuan Lukas Lacko a hmachhawn ang - Japan tlangval hian hnehna a chang chho zel a nih chuan quarterfinal-ah world number 1 Andy Murray nen an inhmachhawn thei dawn a ni.

Nimina inkhel dangah Stan Wawrinka chuan Steve Johnson chu 6-3, 6-4, 6-4 a hnehin a vawi 10 nan Melbourne Park-ah hian third round a lut. Kum 2014 champion Wawrinka hian a match hmasa bera Martin Klizan hneh turin set nga ngawt a khelh a ngai a, a match hnihnaah erawh darkar khat leh minute 51 chhungin nuamsa takin hnehna a chang - aces vawi 11 siamin set a hloh lo bawk.

Hei le Djokovic
Champion lai Novak Djokovic chuan Thawhlehni tlai khan a match hmasa ber khelin Fernando Verdasco chu 6-1, 7-6 (7-4), 6-2 in a hneh nghal, nizan khan second round-ah Denis Istomin a hmachhawn leh a, he thu buatsaih lai hian result kan hre hman lo.

Grand Slam vawi 12 champion tawh Djokovic hian Australian Open nomawi vawi ruk a chawi tawh a, khawtual tlangval Roy Stanley Emerson nen an champion hnem ber an ni.

Kuminah hian Djokovic hi a vawi sarih nan a champion leh a nih chuan he inelna bika record nei ṭha ber a ni ang.

Kum 29-a upa Djokovic chuan, "Melbourne ka thlen hi chuan ka in a haw angah ka inngai ṭhin. He hmunah hian tawnhriat ka ngah tawh a, ka hringnuna ka theihnghilh tawh ngai loh tur thil tam tak a awm tawh avangin ka ngaina hle. Ka khingpui tur ka hriat khan a awlsam dawn lo tih ka hria a, hnehna ka chang thei kha ka lawm hle," tiin a sawi.

Australian Open hi...
Kumin Australian Open hi a vawi 105-na a ni a, singles, doubles leh mixed doubles te hmanga inelna hi neih niin Janaury 29-ah zawh a ni ang. Mipa leh hmeichhe naupang tan singles inelna a awm bawk a, heng bakah hian vohbikte tan wheelchair tennis buatsaih a ni bawk.

International Tennis Fede­ration (ITF) hnuaia inelna lian hi hard court (Plexicushion)-ah khelh a ni. Inelna hi court hrang hrang 25-ah khelh niin heng zingah hian Rod Laver Arena, Hisense Arena leh Margaret Court Arena te chu a langsar leh inkhel lian an dahna hmun bik a ni thung.

Australian Open-ah hian Grand Slam dang pathum ang bawkin mipa leh hmeichhe lawmman a inzatin an sem ṭhin, singles champion hian $3,700,000 (Rs 25,14,70,500) an dawng dawn; pahnihna chuan $1,900,000 (Rs 12,91,09,750) an dawng ang.

Australian Open hi kum 1905 khan match hmasa ber chu Melbourne-a Warehouseman's Cricket Ground-ah khelh a ni. He Grand Slam inelna hi a tirah chuan Australasian Championships tih a ni phawt a, chumi hnu kum 1972 aṭang khan Australian Championships tih niin tuna a hming 'Australian Open' hi kum 1969 aṭang khan a pu ṭan chauh.

Melbourne Park-ah hian kum 1988 aṭang khan inelna hi an nei ṭan a, kum 1905-87 inkarah kha chuan Grass Court-ah khelh ṭhin niin kum 1988-2007 chhung kha chuan Hard Court (Rebound Ace) ah khelh niin tuna an hman lai Hard Court (Plexicushion) hi kum 2008 aṭanga an hman ṭan kha a ni.