China pawisa hnartu Toure
Manchester City midfielder Yaya Toure chuan Chinese Super League lam aṭangin karkhata £430,000 hlawh tura sawmna hmu mah se a hnar a, sum tam tak aiin Premier League-a hun hman zel a la duh zawk.
Kum 33-a upa Toure hi Chinese club a hming tarlan loh aṭangin tun season ṭan dawn khan sawm a ni tawh a, Barcelona-a amah duh lotu Pep Guardiola-a'n City a enkawl dawn tih hre chungin Etihad Stadium-a cham a thlang. Tun hnaiah Toure hi CSL club amah sawmtu hian an la duh thu hrilh mah se a vawi hnih nan a hnawl a ni.
Kumin nipuia a contract hmang zo tawh tur Toure hi season ṭantirah coach Pep Guardiola chuan squad-ah pawh a telh duh lo a, November thlaa squad-a kohkir a nih hnuah erawh league match sarih chhung chu inkhel bul a ṭan leh tawh. Germany midfielder Ilkay Gundogan-a'n December 14-a hliam a tawrh hnuah phei chuan Ivorian midfielder hi City player pawimawh ber pawl a ni leh der tawh a, Gundogan hi tun season-ah a inlan dawn tawh lo.
Toure hian thla ruk chiah contract a neih tawh avangin January thla chhungin a club zawm tur thlang lawk thei mah se thutlukna engmah a la siam lo a, hetihrual hian Guardiola chuan kum 2010-a Barcelona aṭanga City lama a kaltir tak player hi a contract pawhsei sak a nih dawn leh dawn loh chungchangah engmah thutlukna a la hrilh lo.