Bagan hero Jeje Lalpekhlua

Mizo tlangval Jeje Lalpekhlua'n inhliam vangin thla hnih dawn khelmualah mumalin a hmel a lan thei lo a, nikum November thla hnua minute 90 a inlan lehna hmasa berah goal hnih a khung. Mohun Bagan-in Thawhlehni tlaia Minerva Punjab 4-0 a an sawp ṭumin Hnahthial tlangval hi hero of the match-a thlan a ni bawk.

Jeje tel loin

Chennaiyin FC-in November 20 khan Atletico de Kolkata an mikhual a, minute 20-na lekah India striker Jeje chu inhliam vangin thlak a ni. Hemi ṭum hian Mizo tlangval Jeje hi Mizo tlangval tho Daniel Lalhlimpuia'n a rawn thlak a, India ram inelna sangah Mizo an pawimawh tih lang mah se Chennaiyin leh Mizo tan Jeje inhliam a lawmawm loh.

Jeje awm loh hnuah Chennaiyin FC-in match thum dang an khel a, point khat chauh an hlawhchhuah avangin ISL no­mawi humhim turin semifinal an thleng zo lo. Italian manager Marco Materazzi hoten foreigner ṭha ngah tho mah se Jeje tel loin sera mu an thur zo lo.

Contract thar

Mizo striker Jeje hian inhliam vangin duhthusamin ISL khar thei lo mah se I League club chilti puttu a la ni reng a, Mohun Bagan hmelma kumhlun East Bengal-in an ngam huai hle.

Jeje-a'n a hma­lam hun tur uluk takin a ngaihtuah a, East Bengal lama kal aiin I League no­mawi leh Fede­ration Cup a lo chawipui tawh Mariners tana contract ziah thar a thlang ta bawk. Indian football hrechiang te chuan Jeje hi tun I League khelh meka Indian player zinga hlawh hnem ber tiin an chal a, mipui tluklehdingawn khat chuang chenna rama Hnahthial tlangval thlen chin hi a nep lo hle.

Chona harsa zawk

Jeje hian chawlh hmanga Mizorama a awm lai pawhin ngaiawh leh tumin theihtawp a chhuah a, amaherawhchu vanduaithlak takin RG Stadium, Mualpuia training a neih ṭumin a chawn hnuai lam deuha a hliam sa chu a ti na nawn.

Kolkata-ah Jeje hi inhliam chungin a let a, hei vang hian Mariners-in Churchill Brothers an hneh ṭumin a inlan lo a, Shillong Lajong laka point thum an hlawhchhuah ṭum pawhin minute thum chauh a inlan bawk.

Jeje awm loh chhungin a elpui Balwant Singh-a'n chakna goal a khung a, Scottish striker lak thar Darryl Duffy-a'n goal hnih a khung bawk. Mizo tlangval hi season liam taa a chet ṭhat avangin khelhna hmun pek a ni dawn tih a chiang a, amaherawhchu insiam rem nan hun tam a nei dawn lo tih a chiang tel bawk.

Jeje is back

Thawhlehni tlaiah Mohun Bagan-in tun season aṭanga an hman ṭan Rabindra Sarobar Stadium-ah Minerva Punjab an mikhual a, Mariners tlarhmaah Jeje leh Swansea City striker hlui Darryl Duffy te chu inkawptir a ni.

Hnahthial tlangval hian tun season-a a goal hmasa ber khung turin darkar chanve pawh a mamawh lo a, minute 28-naah a goal hmasa ber a khung. Jeje hian minute 77-naah a goal hnihna a khung a, hattrick siamna hun ṭha bik erawh a bawhpelh thung.

Mohun Bagan chhuanvawr Jeje chuan, "Thla hnih dawn ka chawlh hnuah a vawi khat nan minute 90 ka khel thei a, goal hnih ka khung bakah hero of the match a thlan ka nih bawk avangin a lawmawm bik hle," tiin a lawm thu Vanglaini palai a hrilh.

Jeje hian a inkhelh leh theih thu sawi mah se 100% erawhin a la dam lo tih a sawi tho a, ngai awh tur chuan hun a mamawh tur thu a sawi tel bawk.

Mizo tlangval Jeje chuan, "Duffy nen kan vawi khat bul ṭan dunna a ni a, khelhpui a nuam khawp mai. Midang tana khel thiam a nih avangin kawppui a nuam dawn a, Mariners tan player pawimawh tak a nih chho zel ka ring," tiin a kawppui a fakzui bawk.

Mariners hian January 21 hian Chennai City an tlawh dawn a, I League club thar khelmual JN Stadium hi Chennayin FC home match khelhna a nih avangin Jeje hi a mikhual lo ang.