Costa-a'n China a pan dawn lo

Chinese Super League club Tianjin Quanjian neitu Shu Yuhui chuan tun hnaia Chelsea chhuahsan tur anga sawi Diego Costa chu CSL lama khel tura an sawm ngei thu a sawi a, mah se tun hnaia Chinese FA-in team pakhata foreigner tel thei zat chu pathumah a tih tlem avangin an dawr zui loh tur thu a sawi tel bawk.

Spain international Costa hian an league match hnuhnung bera Leicester City a hmachhawn loh hnuah first team training a zawm leh a, Thawhṭanni kha chuan mimalin training neihtir a ni.

Shu chuan Costa bakah hian khawvel huap striker langsar Karim Benzema, Radamel Falcao leh Edinson Cavani te chu lakluh tuma an dawr hman thu a sawi a, "Mah se khawvel player langsar tak tak lalut tura ruahmanna kan kalpui mek laiin Chinese FA chuan ti hian thutlukna an siam leh ta si a ni," tiin an duhzawng player pawh an lak theih loh thu a sawi.

Sumdawng hausa tawntaw Shu chuan, "Costa lakluh tuma kan dawr thu an sawi hi thudik ngei a ni a, ani bakah hian Edinson Cavani pawh kan dawr a, inbiakna pawh thui tak kan kalpui hman a ni. Chinese FA-in dan thar a duan hma khan Costa leh Cavani hi lalut hman tawh tur kan ni a, mah se an club lamin chhuahtir an duh bik loh avangin a hlawhtling hman lo chauh zawk a ni," a ti.

Shu chuan CSL-ah foreigner pathum chauh an khelh theih tur thu tihchian a nih hma hian Monaco striker Falcao leh Benfica forward Raul Jimenez te chuan a thuphunga an club tana khelh an remtih hman thu a sawi bawk. Shu chuan, "Striker lakluh tumin mi hrang hrang kan bia a, Benzema pawh kan bia. Mahse, he dan thar hian minti buai em em a ni," tiin Chinese FA lakah a lungawi lo hle.

Tianjin hi Italy captain hlui Fabio Cannavaro enkawlna hnuaia khel an ni a, tun season-ah Chinese Super League khel tura inpetkai ve chauhin hming langsar zingah Belgian midfielder Axel Witsel chu kum khata pound maktaduai 15 hlawh turin January transfer-ah an lalut tawh.