Atletico leh Barca inlan zan

Copa del Rey quarterfinal-ah Barcelona-in zanin dar 1:45 hian Real Sociedad an hmachhawn dawn a, Atletico Madrid-in zanin dar 11:45-ah Eibar an mikhual bawk ang.

Spain rama knockout football inelna ngaihhlut Copa del Rey hi double legged-a khelh a ni a, January 25 khian second leg khelh a ni ang.

Harhtharna chang

Barcelona-in kumina an match hmasa berah Athletic Bilbao 1-2 in an hneh lo a, La Liga-ah Villarreal an draw leh bawk. Catalan club tan Lionel Messi a mal ṭan rei lo a, Luis Suarez leh Neymar ten goal an khung ve meuh chuan Bilbao lakah comeback ropui an lantir a, Las Palmas 5-0 in an sawp chhunzawm bawk.

Luis Enrique hote hi chak tura rinkai an ni a, amaherawhchu khualmuala result ṭha an neih loh avangin Estadio Anoeta-ah chesual thei an ni. Barcelona hi away match hnuhnung pangaah vawi khat chiah an chak.

Real Sociedad hian Thawhṭanni zan khan Malaga chu 2-0 in league-ah an hneh a, competitive match hnuhnung 14-ah vawi hnih chiah an chak lo. Royals hian Real Madrid leh Sevilla te chiah an hneh lo a, La Liga lamah Atletico Madrid an hneh thei a, zanina an khingpui tur Barcelona an draw thei bawk.

Atletico fiahna

Atletico Madrid-in kum 2017 bul ṭan nan Las Palmas 2-0 in an hneh a, hemi hnu hian Eibar hneh mah se an mualah Las Palmas 2-3 in an hneh lo - quarterfinal erawh an lut tho.

Diego Simeone hote hian an match hnuhnung berah Real Betis goal khatin an hneh hram a, November thla tawpa an khelh ṭhat loh avangin league-ah palinaah an awm mek. An khingpui tur Eibar hi league-ah pakuanaah awm mah se an club theihna aṭanga chhut chuan an dinhmun a sang a, Copa del Rey quarterfinal lut turin Sporting Gijon leh Osasuna te an hneh a, match liah hian chak loh an nei lo.