Beisei pha lo Kerber chak

Champion lai Angelique Kerber-i'n Australian Open nomawi a kawl lai humhim turin awlsam taka chak a la nei lo. Ningani khan German nula hian a hnampui Carina Witthoeft hnehin third round a lut.

Melbourne Park-a inkhelah world number 1 Kerber hian darkar hnih leh minute riat an inkhelh hnuah Witthoeft hi 6-2, 6-7 (3-7), 6-2 in a hneh hram, nikum lam ang bawkin Kerber hian a match hmasa berah set a hloh tawh bawk.

Nilainia kum 29 tling chiah Kerber chuan, "Chona hautak hma­chhawn hi ka tan a hlu a, ka tan chuan thil thar zel a ni. Nuam ti tak chunga round sang zawk luh zel ka tum," tiin ka sawi. Third round-ah Kristyna Pliskova a hmachhawn leh ang.

Venus a la tar lo

Kum 36-a upa a ni tawh a, tennis court-ah erawh a la tar lo. Venus Williams chuan second round-ah Stefanie Voegele chu 6-3, 6-2 in a hneh a, he inelna bikah hian third round vawi 13 a luhna chiah a ni bawk.

American star Venus hian kum 1998 aṭang khan Australian Open hi a lo khel tawh a, kuminah hiam hmeichhe player upa ber a ni. Tun ṭum hi Venus-i'n major tournament vawi 73 a khelhna niin nomawi pasarih a chawi tawh. Australian Open bikah erawh a la champion lo, kum 2003 khan final lut mah se a nau Serena Williams lakah a chak lo thung.

Venus chuan, "Ka kum zat hi zawhna ka dawn hnem berte zinga mi a ni mek a, ka tan chuan hetianga upa ka ni tawh chung pawha ka inkhel thei hi a hlu hle. Player naupang zawk lo hmachhawn hi nuam ka ti a, chutih rualin ka tan chuan nitin zir tur a la awm thar zel tho," tiin a sawi.

Williams te unau hi doubles-ah inlan tur ni mah se Venus hi a kiu (elbow) a hliam avangin a inlan thei lo. Venus hian single third round-ah Chinese player Duan Yingying a hmachhawn leh ang.