China bangpui vaw ṭhiattu Carolina Marin

Badminton sawi rualin rilruin khawchhak lam a hawi a, mitthlaah Chinese shuttler ho an rawn lang nghal zut zut ṭhin. World badminton powerhouse China hian Olympic hmeichhe singles inelna hnuhnung paliah gold medal an la fai vek!

Nikum August thla khan South America-ah a vawi khat nan Olympic chu nghah niin Brazil khawpui pakhat Rio-in a thleng. He infiamna khawmpui liana badmintion hmeichhe singles final-ah Carolina Marin chuan gold medal a la a, kawvelin badminton a thlir dan chu loh theih lohin a her danglam a ngai.

Duhthlanna

Real Madrid leh Barcelona te awmna, FIFA World Cup leh Euro nomawi pawh kawl kawp thei Spain ramah 15 June, 1993 khan Marin hi a lo piang a, a naupan lai chuan an ram lam (dance) chi khat 'flamenco' a zir ṭhin. Football tih lohah chuan Tennis ngainatna rama piang a ni bawk a, infiammi zinga a ngaihsan ber pawh badminton star ni loin Grand Slam vawi 14 champion tawh Rafael Nadal a ni daih mai.

Badminton a hmelhriat dan sawiin Marin chuan, "Nikhat chu ka ṭhiante nen badminton hall-ah kan lut a, ka thil hmuh chuan ka rilru a luah nghal hle. Khatihlai khan infiamnaah chuan tennis kha ka en ngun ber a nih avangin racket-a thil vuak kha ka ngaina a ni," a ti.

Flamenco a zir zel dawn nge badminton racket a hum dawn tih chu kum 12-a upa a nihin thlan a ngai a, chutihrualin lehkha a zir chhunzawm zawk dawn nge tih chu a la chiang thei chuang lo. A kum lehah chuan badmintion national U15 championships-ah inlanin coach Fernando Rivas-a'n a lo hmu fuh chat.

Kum 14 a tlin chuan a pian­na, a chhungkua leh ṭhianṭhate awmna ni bawk Huelva chhuah­sanin badminton luhchilh tak tak turin Madrid a pan a, heta

ṭang hian tun thlengin hnunglam a hawi tawh eih lo.

Mibik chu

Carolina hian atirah chuan IES La Orden badminton club tan a khel ṭhin a, kum 2009 khan Spanish badminton player te la tih theih ngai loh tiin European Junior Badminton Championships-ah silver medal a dawng a, a kum lehah gold a la zui bawk.

Feet 5 leh inches 7.5 a sang Marin hian a hnampuite tih theih ngai lo a ti chhunzawm zel; 2013 London Grand Prix Gold-ah a champion leh a, Indian Badminton League (IBL)-ah a inlan bawk.

31 August, 2014 a ni a, Spain tleirawl duhawm Marin hian Chinese shuttler Li Xuerui hnehin BWF World Championships-ah a champion. European hmeichhe player zingah Lene Koppen (1977) leh Camilla Martin (1999) te hnua hetiang dinhmun luah leh thei hmasa ber niin hetihlai hian kum 21-a upa chauh a la ni.

Superseries Premier final a khelh hmasak ber 2015 All England-ah a champion zui a, India Open-a a hlawhtlin leh hnuah world number 1 Li Xuerui hnuk thlain a chung berah a invawrh kai. Hlawhtlinna a chan tam tak zingah kum 2015 khan World Championship final-ah Saina Nehwal hnehin a zawnin a champion leh bawk.

Kum 2015 Hong Kong Open champion Marin chuan, "Chinese mite hian min ngaina vakin ka ring lo. A chhan chu an player ṭhate ka hneh thei a, badmintion bangpui tia an sawi ṭhin chu vuak ṭhiah theih a nih zia ka sual chhuak a ni," tiin a sawi. Tunlai khawvelah China chiah ngaihven theih a ni tawh lo a, India, Japan leh Malaysia te hian player ṭha tak tak an kawl thu a sawi tel bawk.

Khawvel a ngam

Marin chuan Rio Olympic gold medal la tura a inbuatsaihna chu sawi chhuah rem lo leh hriatreng loh a duh zawk hial thu a sawi! Hetihrual hian a taimak leh thawhrim rah chu a thlum bik zia a hriat belh thu a sawi tel bawk.

PV Sindhu hnehna Olympic gold medal latu Marin chuan, "Rio Olympic hma thla hnih chhung inbuatsaihna kan neih chhung kha chuan nitin deuhthaw hian ka ṭap ṭhin. Ka coach khan min hrual dan ang kha chuan a fate a thunun phal lo hial zawk ang ka ring! Rio inbuatsaih lai kha chuan ni khatah vawi thum training ka nei a, tunah chuan vawi hnih chiah a ni tawh," a ti.

Kum 23-upa Marin chuan sawi chhunzawmin, "Hlawhtlin kan duh takzet a nih chuan natna leh harsatna kan paltlang a ngai a, kan theihnghilh a ṭul bawk. Sindhu ka hneh chiah khan ka thawhrimzia ka hre chhuak thar leh a, ka tumram thleng tur chuan ka theihna zawng zawng ka hmang a ni," tiin a sawi.

Khawval a ṭha ber, thiam leh tlo ber ni thei tur chuan eng kawngah pawh a awlsam lo. Badminton huangah hei hi a dang chuang lo a, Marin tan khawvel ngamtu ni turin kawng awlsam a hrana siamsak a ni bik lem lo.

World champion vawi hnih ni tawh Marin chuan, "Tu mah hian ka inzirna leh ka nun hautak zia hi an ngaihtuah phak lo ang. Ka chhungte chu Huelva-ah an chen daih avangin a zawng zawngin min hriatpui thei lo. Ka coach, trainer, physiotherapist leh mental coach thleng pawh hian min hmuh pui phak vek lo," a ti.

A hmunah El Clasico

Marin hian infiamna dang pawh a hlamchhiah tawp lo. Khawvela football club-ah chuan Barcelona a ṭan ber a, Barca a ṭan chhan hi a pain a ṭan vang niin footballer-ah chuan Lionel Messi thiam a ti ber a, a duh ber erawh a hnam pui Andres Iniesta a ni thung.

Camp Nou-a inkhel en chungchang sawiin Marin chuan, "El Clasico ka en tawh a, a ropui ka ti hle. Madrid-a ka awm rei avangin mi tam takin Real ṭan tura min ngaih bakah min nawr ṭhin. Mahse, kei chuan football chu infiamna chi khat mai a nih avangin kan duh duh kan ṭan theih thuin ka chhang ṭhin," tiin a sawi.