DSK Shivajians an chak ve ta

Dave Rogers-a kaih­hruaina hnuaiah DSK Shivajians-in I League-ah chak hmel an hmu ta a, Thawhlehni zan khan an mual Balewadi Stadium-ah kai thar Chennai City FC 2-0 in an hneh.

Pune khaw club DSK tan hian minute 30-naah captain Juan Quero-a free­kick chu Kim Song Yong-a'n a tauh lut a, minute 56-naah North Korea striker Kim-a penal­ty hlawhchhuah chu Real Madrid youth system chhuak Quero-a'n goal-ah a chantir leh bawk.

Thawhlehni zan in­khelah hian DSK tan Jerry Mawihmingthanga leh Lallianzuala ten inkhel bul an ṭan a, Liverpool training pawh chhim tawh DSK Academy-a inzir Jerry leh Lianzuala te hian match zawnin vawi thum inkhel bul an ṭan ta. MPL4 best midfielder K. Lalṭhathanga (Puitea) pawh match hmasa bera left back a bul a ṭan hnuah Chennai City nen bench aṭanga tlan lutin a thiamna tak midfield laiah a inlan.

ISL hnuhnung bera Chennaiyin FC tana in­lan Jerry Lalrinzuala pawh­in inkhel bul a ṭan a, Bethlehem Veng tlang­val hian hun chanve hmalamah hliam tenau nei mah se khelh tluantir a ni. Chennai City tan MPL5-a best player Malsawmfela'n a vawi khat nan inkhel bul a ṭan a, scoresheet-ah a hming a la thai lang thei lo.

DSK hian point thum chauh hmu mah se paruknaah an invawrhchho a, Chennai City erawhin an match hmasa bera Minerva Punjab an draw hnuah point an la hmu leh lo. Dave Rogers-a hote hian Churchill Brothers (Jan 21) leh Mohun Bagan (Jan 24) an mikhual leh phawt ang a, chumi zawhah RG Stadium, Mualpuiah February 1 khian Aizawl FC an hmachhawn ang.

Team Dinhmun
# Team Pld W D L GF GA GD Pts
1 Mohun Bagan 3 3 0 0 7 0 7 9
2 Aizawl FC 3 2 1 0 4 2 2 7
3 Bengaluru FC 2 2 0 0 5 0 5 6
4 Mumbai FC 2 2 0 0 3 1 2 6
5 East Bengal 2 1 1 0 3 2 1 4
6 DSK Shivajians 3 1 0 2 3 3 0 3
7 Chennai City 3 0 1 2 0 4 -4 1
8 Minerva Punjab 3 0 1 2 0 5 -5 1
9 Churchill Brothers 2 0 0 2 1 3 -2 0
10 Shillong Lajong FC 3 0 0 3 1 7 -6 0