Louis van Gaal-a chawl leh lo!

Manchester United manager hlui Louis van Gaal chuan Thawhṭanni khan coaching khawvel a chawlhsan thu puang mah se, a thu chhuak thar ber chu a chawlh leh loh thu a ni!

Kum 65-a upa manager chuan, "Coaching ka chawlhsan anga sawi hi thudik lo a ni a, tun dinhmunah chuan chawlh ka la rih mai chauh zawk a ni. Ka hma hun awm zel dan tur chu June emaw July-ah ka tichiang ang," a ti.

Chawlh thu

Dutch chanchinbu lar De Telegraaf chuan Thawhṭanni khan Van Gaal-a'n coaching a chawlhsan thu an ziak a, Bayern Munich coach hlui thusawi nen lam an tarlan vek avangin khawvelin LVG hi chawlah ngai vekin football khawvel titi luahtu ber a ni.

De Telegraaf-in an tarlan dan chuan Van Gaal hian, "Chawlh ka tum zet a, mah se reilote chawlh hahdam lam ka awn leh zawk a, tunah erawh coaching khawvelah ka lo kir ka ring tawh lo," tiin a sawi niin an tarlang a, LVG thusawi hi Dutch sorkar-in football lama a thawhhlawk avanga lifetime achievement award an pek hnu lawka a sawi a ni.

LVG hian December khan a makpa a sun a, hei hi coaching a chawlhsan chhan ni a tarlan a ni. Dutch manager chuan, "Kan chhungkuaah thil thleng tam tak a awm a, kan hmaah harsatna hmachhawn tur a awm ran hi chuan mihring kan nihzia bawk kan inhre chhuak leh ṭhin," a ti.

Tiamthu sut!

May, 2016-a Manchester United-in an ban hnua coaching hna thawk leh tawh lo LVG chuan a chawlh thu hi nimin khan sut lehin, "Coaching ka la chawlhsan lo a, ka chhunzawm zel dawn leh dawn loh erawh sawmna ka hmuh dan a zirah a innghat ve bawk ang chu," a ti.

LVG hian Asian club pakhat a hming tarlan loh hnen aṭangin kum thum chhunga pound maktaduai 44 hlawh tura sawmna a hmuh thu a lo sawi tawh a, thla hmasa khan Spanish club talbuai mek Valencia dawrna a hnawl thu a sawi bawk.

Old Trafford-a a season hnu­hnung bera FA Cup nomawi chawitu manager chuan a sawmna hmuh a hnar chhan sawiin, "Club hrang hrang ka lo enkawl ve tawh a, tun dinhmuna sawmna ka hmuhnaah hi chuan hmasawnna tur awmin ka hre lo a ni," tiin a la chawlh hahdam chhan a sawi.

Tu nge LVG?

Player-a nihlaia midfield-a khel ṭhin LVG hian Ajax, Royal Antwerp, Telstar, Sparta Rotterdam leh AZ Alkmaar tan kum 1972 leh 1987 inkara a khelh hnuin AZ-ah assistant manager hna chelhin coaching a luhchilh ṭan a, kum 1988-ah Ajax chu assistant ni tura a zawm hnuin kum 1991-ah manager puitlingah hlankai a ni.

Kum 1991-97 chhung Ajax hi kaihruaiin league nomawi pathum bakah 1992 UEFA Cup leh 1995 Champions League-ah te a champion pui a, Spanish club lian Barcelona zawm zuiin season hnih chhung a zawna La Liga nomawi a chawipui bakah Copa del Rey leh UEFA Super Cup-ah a champion bawk.

Barca aṭanga an ram team Netherlands enkawlin kum 1986 hnua a vawi khat nan 2002 World Cup khel turin a inhlankaipui zo lo a, Barcelona-ah kir leh mah se tlak hlauhawm dinhmunah hial an din avangin thla riat bak a cham hman lo tihin a bang a, an ram lamah AZ-ah kirin league nomawi pakhat a chawipui.

Bayern Munich lamah kalin Bundesliga nomawi pakhat, German Cup leh German Super Cup nomawi a chawipui a, season hnih a cham hnuah an ram Netherlands chu a vawi hnih nana enkawlin 2014 World Cup-ah pathumna a nihpui. May 2014 khan David Moyes thlakin United a enkawl a, kum thum chhung atan contract ziak mah se kum hnih bak a cham hman lo.