Black Cats ngam loh Burnley
Thawhlehni zan khan Burnley chuan FA Cup fourth round lut turin Sunderland chu 2-0 in an hneh a, Premier League club pahnih inhmachhawnah Clarets (Burnley sawina) an chungnung zawk.
Burnley tan Sam Vokes chuan minute 44-na lekah Tendayi Darikwa ball cross ṭha zet chu mawi takin a tauh lut a, hun tawp nan minute sarih chiah a awm tawh tihin Andre Gray chuan Burnley chak nemngheh nan a khung ve bawk.
Chelsea leh Tottenham ten defender pathum hmangin hlawhtlinna chhar mah se David Moyes-a'n a hlawhtlinpui ve zo lo a, Jason Denayer, Papy Djilobodji leh Billy Jones te an pathum chauha ding turin an 'class' tawk lo. Black Cats tan striker Jermain Defoe chuan hun ṭha nei ve mah se a chhawr ṭangkai thei lo.
Premier League club dang inlan zingah Sam Allardyce chuan a club hlui Bolton Wanderers a mikhual a, Big Sam kaihhruaina hnuaiah Crystal Palace hian 2-1 in hnehna an chang. Mikhual team Bolton tan James Henry chuan hun ṭha vawi tam a hlah hnuah goal hmahruai a khung a, Premier League club an nghing hman.
Mahse, minute 62-naah Christian Benteke a rawn tlan lut a, Liverpool striker hlui hi Palace tan chhandamtu a ni. Belgian striker hian khelmuala hun a hman aṭanga minute rukna lekah an si phurh sutna goal a khung nghal a, minute 77-naah chakna goal khung zuiin 1999 - 2007 chhunga Bolton lo enkawl tawhtu Sam Allardyce-a'n substitution a siam fuh hle.
Inkhel Results
Burnley 2 - 0 Sunderland
Barnsley 1 - 2 Blackpool
Fleetwood Town 0 - 1 Bristol City
AFC Wimbledon 1 - 3 Sutton United
Crystal Palace 2 - 1 Bolton Wanderers
Lincoln City 1 - 0 Ipswich Town