Africa Cup of Nations A bulṭan nan Ghana chak nghal

Ghana tan Andre Ayew penalty chhuih luh chu Africa Cup of Nations 2017-a an match hmasa bera a hnehna an chan nan a tawk.

Thawhlehni zan khan West Ham winger hian captain Asamoah Gyan penalty hlawhchhuah chu minute 32-naah goal awmchhun ni turin a khung a, goal khata hma an hruai hnuah Ayew leh Christian Atsu te chuan Uganda goalkeeper Denis Onyango tan hna hautak an siamsak bawk.

Uganda hian kum 1978 hnua a vawi khat nan Africa Cup of Nations an khel leh chauh a, an group match hmasa berah hian Faruku Miya chuan goal khung tura hun ṭha a neih a chhawr ṭangkai zo lo.

Vawi li champion tawh Ghana hian Inrinni zanah Mali an hmachhawn leh ang a, he mi zan vek hian Uganda hian champion hnem ber Egypt (7) an hmachhawn ve bawk ang.

Egypt tan El-Hadary

Group D inkhel dangah kum 44-a upa Egypt goalkeeper Essam El-Hadary chu Mali nen goal awm lo a an inhnehtawkna inkhelah a inlan a, he inelna bika inlan thei upa ber a ni.

Egypt tan hian Ahmed El-Shenawy chuan inkhel bul ṭan zawk mah se hliam vangin first half-ah lakchhuah a ngai a, a thlak turin El-Hadary dah luh a ni. Egypt legend El-Hadary hi ram tan vawi 148 a inlanna niin Africa Cup of Nations hi ṭum sarih a khelhna chiah a ni bawk - kum 2006, 2008 leh 2010 te khan an ram hi champion nomawi a lo chanpui tawh.

Arsenal midfielder Mohamed Elneny chu Egypt tan a inlan a, kum 24-a upa Elneny hian goal khung theihna hun ṭha vawi hnih neiin vawi khat chu a pet over bakah goal ban hrulah a pet chhuak. Ani bakah hian Chelsea winger hlui Mohamed Salah hmel hmuh tur a awm bawk.

Mali tan Egypt laka point khat hmuh hi result chhia a ni lo, player langsar nei lo ram hian Africa Cup of Nations-ah hian vawikhatmah hnehna an la chang ngai lo a ni.