Inter District Junior Football champion Siaha

10th May, 2022

Inter District Junior Football Championship 2022 final-ah Siaha chuan Kolasib chu 1-0 a hnehin an champion. Mizoram pum huap inelna hi Hnahthialin an thleng a, district 11 aṭangin team an tel kim vek.

Nimin final hmuhnawm takah goal hmuh tur a awm lawk lo a, goal lut chhun erawh champion-na goal ni tura mawi a ni. Minute 89-naah Siaha player Ephraim-a'n box pawn chiahah ball changin Kolasib player-ten an hnaih hmain goal kilah mawi zetin a pet lut.

Siaha midfielder Zomuanpuia chu best player-ah thlan a ni a, ani hian goal khung lo mah se defensive midfield aṭangin ball fing a pe chhuak hnem hle. Champion team hian tun inelna chhungin goal 10 an khung a; final-a chakna goal khungtu Ephraim bakah Elisa Lalchamliana, John Litas leh Keneth B. Beihropakhai ten goal hnih ṭheuh an khung.

Siaha coach Beichaku chuan, "Siaha chuan academy ṭha kan neih loh avangin hun rei lote chhungin basic inzir hmanah kan ngai lo. Ni 22 chhung kan inpuahchah a, fitness kan ngai pawimawh a, fitness hi kan champion-na chhan a ni. Final-ah pawh pressure kan pe ṭha a, kan tight zung zung avangin hnehna kan chang. Kan champion avangin kan lawm takzet a, min tirtu Siaha DFA bakah inelna thlengtu Hnahthial DFA ten min thleng ṭha a, an chungah kan lawm takzet," tiin Vanglaini a hrilh.

Beichaku hi Mizo footballer ṭha Beikho-khei Beingaichho unaupa a ni a, Beikhokhei hi East Bengal, Bengaluru FC leh Mohun Bagan tan te pawha khel tawh a ni.

Final hi MFA honorary secretary Lalnghinglova Hmar bakah Mizo professional footballer Jeje Lalpekhlua leh Isaac Vanmalsawma ten an chhim a, SYS and Tourism Board vice chairman TC Pachhunga chu khuallian a ni.

Inelna Thlirna Tawi
Champion Siaha
Pahnihna Kolasib
Best Player Zomuanpuia, Siaha
Top Scorer PC Rosangzuala, Hnahthial (9 goals)

Champion Kalkawng
Group Stage
May 4, Nilaini
Siaha 3 - 2 Serchhip
SIA : Elisa Lalchamliana 16'; S. John Litas 56'; Calvin Siakhel 89'
SER : Lalruatsanga 5', 53'

May 5, Ningani
Saitual 1 - 4 Siaha
SAI : Ramthianghlima 44'
SIA : John Litas 34'; Immanuel Lalruatpuia 36' (OG); Ephraim 84'; Keneth Beihropakhai 89'

Semifinal - May 7, Inrinni
Siaha 2 - 1 (a.e.t) Aizawl
SIA : Elisa Lalchamliana 43'; Keneth B. Beihropakhai 112'
AIZ : Jonathan Lalfakawma 90+2'

Final - Nimin Inkhel Result
Kolasib 0 - 1 Siaha
SIA : N. Ephraim 89'