Arsenal tan UCL a hnai takzet ta

Champions League ticket nei turin Arsenal chuan an dinhmun an sawhnghet zel. Gunners hian Ningani zanah Tottenham Hotspur an lenchilh dawn, an hmelma club lakah hnehna an chang thei a nih chuan European football inelna sang ber khel turin an tling fel der ang.

Mikel Arteta naute hian Eddie Nketiah-a goal hnih hmangin Leeds United 2-1 in an hneh. Premier League match 35 aṭangin point 66 an hmu a, palina niin an hnuaia awm Spurs aiin point liin an sang zawk - khelh hmabak pathum chauh an nei tawh.

Point thum an hmu
Pathianni zan Emirates Stadium-a inkhelah laipui a puak hma hle. Inkhel ṭan aṭanga minute 10 chhung lekin Arsenal lamin goal hnih an nei hman. Nketiah-a'n Leeds lam back pass chu a hnaihchilh hman a, keeper Illan Meslier pet chhuah hmain a pet khalh, minute ngana lekah a goal nghal.

Jesse Marsch naute an insiam rem hman lo, forward Gabriel Martinelli-a'n box chhungah ball la lutin Nketiah tan a siamsak, ani hian harsatna nei loin an goal hnihna a lo khung, minute 10 lekah chak zawk tur a chiang.

Leeds an buai zui. Defender leh captain ni bawk Luke Ayling-a'n hlauhawm takin Martinelli a titlu a, a tirah yellow card pek ni mah se VAR hmanga an ennawn hnuah hnawhchhuah a ni, goal hnih an phurh bakah player pakhatin an tlem.

Arsenal ṭantute beisei ang ngawtin thil a thleng bik lo. Goal an khung belh theih loh bakah anmahni lamah a lut. Mikhual tan Diego Llorente chuan corner aṭanga ball an tauh per chu hnai takah a khung, goal dang erawh an neih belh thei lo.

Kal dan ngai
Crystal Palace, Brighton leh Southampton an hneh loh hnuah - Chelsea, Manchester United, West Ham leh Leeds an hneh ta a, manager Arteta chuan Tottenham an lenchilh hunah pawh tunlaia an boruak ang chu neih chhunzawm a duh.

Gunners coach Arteta chuan, "A bul kan ṭan ṭha, duhthusam vek ni lo mah se point thum hmuh theih hi a hlu," a ti. Spanish manager hian a striker Nketiah khelh dana a lawm thu leh, tun hnaia a hmasawnna chu lawmawm a tih thu a sawi bawk.

Chak lo Leeds erawh tla thei dinhmunah an ding, an elpui Burnley nen point 34 ve ve nei mah se an goal difference a chhe zawk. An hmabakah Chelsea, Brighton leh Brentford an la tum dawn, inhamtang tur chuan a thapui an thawh a ngai ang.