Messi vanduai a kaltluang

Ligue 1 champion Paris Saint Germain chuan Pathianni zan khan 15-na Troyes an mikhual a, 2-2 in an inhnehtawk. Parc des Princes-ah PSG-in Marquinhos leh Neymar penalty hmangin 2-0 in hma hruai mah se Troyes hian Ike Ugbo leh Florian Tardieu penalty hmangin an sut zo.

PSG hian tlarhmaah Lionel Messi, Neymar, Kylian Mbappe leh Angel di Maria te dah mah se hnehna an chang thei lo. Barcelona aṭanga Paris pantu Messi pawh a vanduai zel. Argentine forward hian tun season-a a vawi 10 nan woodwork a tihper.

Kum 34 mi Messi hian tun season Ligue 1-ah match 24 zet khel mah se goal li chiah a khung a, chutihrualin assist vawi 13 a nei tawh. Opta statistics-in a tarlan danin Messi hi season khata woodwork tih per tam ber a ni a, Opta statistics hi 2006-07 season aṭanga ṭan a ni.