City an chak; Pep-a'n Liverpool a kap zui!

Liverpool-in Inrinni zanah Tottenham Hotspur an hneh thei lo a, Premier League inkhel pawimawhah 1-1 in an inhnehtawkpui - Reds ṭantute mitthlaah Manchester City an lo lang nghal.

Inkhelh zawhah Jurgen Klopp-a'n City chetsual a rin loh thu a sawi zui a, German coach hian, "City hian point an hloh ka ring lo. Heti lo zawnga ngaihtuah theih ka duh a, mahse, City hi an chetsual ka ring tawh tlat lo a ni," a ti.

Pathianni zanah Klopp-a rin lawk ang ngeiin City an chesual duh lo a, tun hnaia khel pangngai tak Newcastle United chu 5-0 ngawtin an sawp - Premier League table chung ber an luah zui.

City tan hian Raheem Sterling chuan goal hnih a khung a, Aymeric Laporte, Rodri leh Phil Foden ten goal khat ṭheuh an khung bawk. Match thum chauh khelh tur awm tawhah Liverpool aiin point thumin an sang.

Mi zawng zawng duhsak
City an chak a, Pep-a'n an chanchin sawi duhtawk mai loin Liverpool a kap tel. Spanish coach chuan, "He ram a mi zawng zawng hian Liverpool an ṭan a, media leh mi zawng zawngin an thlawp," a ti!

Liverpool hian zanin dar 12:30-ah club legend Steven Gerrard-a enkawl Aston Villa an lenchilh dawn - Villa tan tlawm leh chakin awmze thui tak a nei tawh lo a, Stevie G-a enkawl an nih bawk si avangin Pep hian 'pressure' pek lawk a tum a ni thei ang em? A chhanna chu Pep chiahin a hria.

Barcelona boss hlui chuan, "Liverpool hian European football-ah sulhnu ropui tak an nei a, mahse, Premier League-ah erawh a ni lo - kum 30 chhungin vawi khat chauh an champion a ni," a ti!

Liverpool fans tan Pep-a ṭawngkam mei nei tak hi lem a harsa ang tih a chiang a, zaninah chak an duh lehzual dawn - Spanish coach hian season nga chhunga a vawi li nan English top flight league-ah City champion pui a tum mek.

An kiangah
Liverpool hian zanina Villa an hmachhawn zawhah FA Cup final lam an thlir lehnghal a ngai dawn a, Inrinni zan dar 9:15 hian FA Cup final khel turin Chelsea an hmachhawn ang - fixtures a hautak takzet.

Reds hian Villa bakah Southampton (May 17) leh Wolverhampton Wanderers (May 22) te chu league-a hmachhawn tur an la neih a ni a, an chak vek bakah City chetsual chan tel a ngai.

Pep chuan, "Liverpool hi Manchester United nen an nomawi hlawh zozai, sulhnu leh thil tam tak avangin team langsar ber an ni hial mai thei. Mahse, tun hnai kum 11 emaw 12 chhung chu an kiangah hian kan awm ve tawh," a ti.

Spanish coach-in hahipin a club enkawl a fak a, Liverpool pressure pek tel a tum pah bawk - City hian Wolves (May 11), West Ham (May 15) leh Aston Villa (May 22) hmachhawn tur an la nei.

Kan kutah engkim
Pep chuan, "A chang chuan nuam lo kan ti ṭhinin ka hria a, mahse, mipuiin champion turin Liverpool duh zawk pawh ni se kan tan buaina tur a ni lo - point kua emaw point thum emaw hmuh kan la mamawh mai thei.

"Mahse, game hniha thil thleng tur la thlir phawt a ngai a, goal difference thlenga ngaihtuah tel a ngai dawn. Kan tan erawh Nilaini zan (vs Wolves) hi final a ni a, kan kutah engkim a awm," a ti a, Liverpool aia an dinhmun a ṭhat zawk thu a sawi.

Hetihlai hian City hian buaina tur an nei ve tho - an defender pathum Kyle Walker, Ruben Dias leh John Stones te chu tun season-ah hliam vangin an inlan tawh dawn lo.

Mahse, Pep chuan, "Buaina tur a ni lo. Rodri-a'n an position-a a khelh a ṭul chuan a khel mai ang a, academy ami pawh an khel mai ang," a ti - an khingpui tur en ila, tlawm theihna vek a nih avangin a sawi ang ngawt erawh a ni lo ang.

A harsa dawn
Zaninah Reds an inlan dawn a, Pep-a'n thluak game a lo vawrh ṭan a, thil tam tak a lang harsa ṭan - FA Cup final-in Liverpool a la hmuak bawk si a, Klopp-a'n engtin nge a team a rem dawn, tih chu hriat a châkawm hle.

Liverpool tan hliam neih chhun Roberto Firmino-a'n club training a zawm leh tawh a, zaninah a inlan a nih pawhin a mak lo ang. Tlarhnungah Joe Gomez leh Kostas Tsimikas tan hun ṭha a her chhuak ve tawh tura ngaih a ni a, Ibrahima Konate aiah Joel Matip inlan a beiseiawm bawk.

Villa hian coach Gerrard chauh ni loin, Liverpool player hlui Danny Ings leh Philippe Coutinho an nei a, Stevie G hian a club hlui champion tumna kalkawng a dal dawn em? tih chu hriat châkawm a ni ta.

Jacob Ramsey tih loh, tun hnaia hliam thar lam nei lem lo Villa hian tun season Premier League champion tur chungchangah mawhphurhna an nei sang hle - Reds leh City an la hmachhawn ve ve dawn a, Liverpool fan-ten Gerrard-a'n hna a thawhsak an beisei ang.