Everton-in relegation zone an chhuahsan

King Power Stadium-ah Everton chuan mualneitu Leicester City 2-1 in an hneh a, Premier League relegation zone an chhuahsan. Pathianni zan inkhela goal thum hi inkhelh ṭantirh darkar chanve chhunga lut vek a ni.

Everton hian minute rukna lekah Vitaliy Mykolenko chuan Alex Iwobi cross chu boruaka a awm laiin a volley goal a, Toffees-in bul an ṭan ṭha. Amaherawhchu defender Yerry Mina tauh let sual chu Patson Daka-a'n hmang ṭangkaiin minute 11-naah siphurh a sut.

Minute 30-naah Kasper Schmeichel-a'n Richarlison-a ball tauh chu a dang ṭha tawk lo a, awlsam takin Mason Holgate a tauh lut. Foxes hian nawr na chhunzawm mah se England no. 1 keeper Jordan Pickford-a'n Nampalys Mendy leh Harvey Barnes te goal khung tur a dansak a, Everton-in 2-1 in hnehna an chang.

Premier League aṭangin Norwich leh Watford te an tla tawh a; Everton (35 pts), Burnley (34) leh Leeds (34) te zinga pakhat hi an tla leh dawn. Toffees hi elpuite aia point khata an hmuh tam bakah match khatin an khel tlem.

Everton hian Watford, Brent-ford, Crystal Palace leh Arsenal te an hmachhawn leh dawn a, Frank Lampard-a hote hi tla thei dinhmunah ding mah se Chelsea leh Foxes an hneh avangin Premier League-a inhamtang turin an dinhmun a ṭha.