Adeyemi-a'n Dortmund a zawm dawn

Germany interna-tional forward Karim Adeyemi chuan Red Bull Salzburg aṭangin Borussia Dortmund a zawm hnai. Kum 20 mi Adeyemi leh Dortmund te hian a thu phungin inremna an nei tawh a, contract hi an ziah thuai rin a ni.

Adeyemi man hi euro maktaduai 38 vel tura ngaih a ni a, release clause a awm dawn lo. Bayern Munich academy-ah pawh awm tawh Adeyemi hi Munich-a piang a ni a, Austrian club RB Salzburg aṭangin hming a chher.

Tun season-ah Adeyemi hian league match 27 aṭangin goal 19 a khung a, inelna hrang hrangah match 42 khelin goal 23 a khung. Adeyemi pa hi Nigerian a ni a, a nu hi Romanian niin a pianna Munich a nih avangin Germany tan a khel thei a, Die Mannschaft tan match thum khel tawhin goal khat a khung tawh a ni.

Dortmund hian Erling Haaland erawh chelh theih a rinawm lo a, Norwegian striker hi Manchester City nen indawrna an nei mek a, inremna an nei hnai nia sawi a ni.