Madrid derby-ah Atletico chak

Atletico Madrid chuan Pathianni zan khan an hmelma leh La Liga champion Real Madrid chu 1-0 in an hneh a, season thara Champions League khel turin an dinhmun a ṭha.

UCL final khel tur Los Blancos hian Manchester City an hneh ṭuma player pasarih ngawt chu bench-ah an ṭhuttir a, chung zingah chuan striker chhuanvawr Karim Benzema bakah Luka Modric, Vinicius Junior leh Thibaut Courtois te an tel.

Diego Simeone erawhin sa huai a ser a, Wanda Metropolitano-ah an khelh bawk avangin bul pawh an ṭhat ṭha. Minute 40-naah Matheus Cunha chu box chhungah titluk a ni a, Yannick Carrasco chuan penalty aṭangin goal awmchhun a khung.

Second half-ah Carlo Ancelotti-a'n Vinicius Junior leh Federico Valverde te luhtir mah se Atletico goalkeeper Jan Oblak an paltlang thei lo. Atletico hi 1-0 in an chak a, palinaah awmin panganaa awm Real Betis aiin point rukin an hmu tam zawk.