A chung berah Milan awm leh ta

AC Milan chuan kum 11 hnua a vawi khat nan Serie A nomawi chawi ngei an tum, an beiseina tihlawhtling turin kawng dik an zawh. Pathianni zan khan Hellas Verona chu 3-1 a hnehin table hmahruaitu an ni.

Champion lai Inter Milan an chak hmasa a, table chung berah an awm lailawk. Milan hi chak lo ni se la chuan pahnihna an ni leh rih ang. Verona mualah Milan hian goal an chhuah hmasa, Davine Faraoni chuan minute 38-naah hma a hruaipui.

Chawlhlawk hma chiahin Milan lamin Sandro Tonali hmangin an sut a, midfielder Tonali bawkin second half-ah an hmahruaina goal a khung. Hun tawp hmain Alessandro Florenzi chuan chak a nemnghet bawk.

Milan manager Stefano Pioli chuan, "Ka naute khelh danah ka lawm hle, an rilru put hmang a dikin chak ngei ngei an tum ṭhin. Kan zinkawng zawh lai hi a la tawp lo a, a tawp hma chuan chawlh mai pawh a rem lo," tiin a sawi.

Pioli naute hian khelh hmabak pahnih chiah an nei tawh. San Siro-ah Atalanta an mikhual dawn a, season khar nan Sassuolo an mikhual bawk ang, an chak ve ve chuan midang result ngaihchan tel ngai loin an champion dawn.