Harden hoin 76ers an tho chhuak

Game hmasa pahnihah an chak lo a, chiang taka tlak kha a hlauhawm hman. Game 4 an khelh zawh meuh chuan James Harden awmna Philadelphia 76ers chuan Miami Heat chu series-ah 2-2 an nihpui leh ta. Nilaini zingah game 5 an khel chhunzawm ang.

Nimin zing Eastern Conference semifinal game 4 inkhelah 76ers hian Harden-a point 31 neih hmangin 116-108 in hnehna an chang. Harden bakah hian hliam dam hlim Joel Embiid chu a langsar, point 24 a neih bakah rebound vawi 11 a la bawk.

Embiid chuan, "Harden kan nei, ani a awm hi chuan player dang pawh an thla a muang ṭhin. A point neih a tam tawk a, chumi piah lamah midang tana a khelh thiam dan kha a pawimawh zual," tiin a teammate a fak hle.

Western Conference semifinal lamah Dallas Mavericks pawhin beisei an nei ve leh ta. Seeded pakhatna Phoenix Suns lamin best of seven series-ah 2-0 in hma hruai fal thei mah se, tunah chuan 2-2 in an inhnehtawk mek.

Game 4 inkhelah Mavericks hian 111-101 in hnehna an chang. Game 5 hi Suns khelmual Footprint Center-ah khelh a ni dawn, regular season laia hmahruaitu hian match hnih a zawna an chak loh hnuah chak an tum ve leh tawh ang.

NBA Playoff
Western Conference Semifinal
Game 1: Phoenix Suns 121 - 114 Dallas Mavericks
Game 2: Phoenix Suns 129 - 109 Dallas Mavericks
Game 3: Dallas Mavericks 103 - 94 Phoenix Suns
Game 4: Dallas Mavericks 111 - 101 Phoenix Suns
May 11, Nilaini
Game 5: Phoenix Suns 07:30 AM Dallas Mavericks
(Series-ah 2-2 in an inhnehtawk mek)

Eastern Conference Semifinal
Game 1: Miami Heat 106 - 92 Philadelphia 76ers
Game 2: Miami Heat 119 - 103 Philadelphia 76ers
Game 3: Philadelphia 76ers 99 - 79 Miami Heat
Game 4: Philadelphia 76ers 116 - 108 Miami Heat
May 11, Nilaini
Game 5: Miami Heat 05:00 AM Philadelphia 76ers
Note: Inelna hi best of seven series hmanga khelh a ni, tlang turin vawi li chak a ngai.