Tennis lal thar Carlos Alcaraz

'Carlos Alcaraz' tih hming hi lo chhinchhiah rawh u, tennis khawvel chuan he hming hi a lam nawn fo dawn. Spanish rawlthar hian Alexander Zverev hnehin Madrid Open nomawi a chawi, season kal laiah title pali a la tling ta.

Pathianni zan Madrid khawpuia final khelhah, kum 19 mi Alcaraz hian champion lai Zverev hi 6-3, 6-1 in a sawp. Grand Slam dawta inelna ngaihhlut Masters 1000-ah hian champion thei naupang pahnihna dinhmun a luah.

Rafael Nadal chuan 2005 khan kum 18 mi chauh ni chungin Rome Open nomawi a lo chawi tawh, ani hnuah Alcaraz hi Masters title la thei naupang a ni leh chiah. Spanish rawlthar hian Nadal hnung a zui a nih pawhin a mak lo ang.

Madrid Open champion ni tur hian, final kalkawngah Nadal a hneh. Grand Slam vawi 21 champion thei a hneh hian mak tih a hlawh, a hnuah world number 1 Novak Djokovic a hneh zui leh bawk, champion a phu hle.

Thla hmasa lawka Miami Masters champion ni tawh bawk Alcaraz chuan, "Madrid Open hi ka tan a hlu, a chhan chu kum sarih mi vel lek ka nih lai aṭangin he tournament hi ka lo en tawh ṭhin a, ka hriatna a rei tawh.

"Season hmasa khan player ṭha tak tak ka lo hmachhawn tawh bawk a, tawnhriat tam tak ka nei ve tawh. Chu ka tawnhriat chu kuminah ka hmang ṭangkai hle, hnehna ka chang thei ngei ang tih inring chungin court-ah ka lut ṭhin," a ti.

World ranking chhuak tharah chuan Alcaraz hi number 6 a ni dawn, world number 10 china awm thei naupang ber record a lo siam tawh bawk. Tun thla chawhnu lama khelh tur French Open-ah pawh en hlawh bik a ni ang.

French Open khel tura Paris a pan hmain a chawl hahdam rih dawn, hei vang hian clay court inelna dang Rome Open chu a khel dawn lo. A kerek hliam tenau chu enkawl dam hmasak a duh vang a ni.

German tlangval Zverev-a'n a nomawi a hum thei lo a, a chak loh chhanah chhuanlam a siam. Inkhelh hun bichilh lutuk vangin hahchawlhna hun a nei ve mumal hman lo niin a sawi thung.

Kum 25 mi Zverev chuan, "Semifinal ka khel hnuhnung zawk a, chutah set thum kan khel zui. Inkhel zo hotel-ah ka let a, ka intih fel aṭanga darkar rei vak lo hnuah final ka khelh zui leh nghal a ngai, hei aia hun ruat thiam hi a pawimawh," tiin a sawi.

Zverev hian final-a a hneh loh tak Alcaraz chu khawvela player ṭha ber nia a hriat thu a sawi bawk. Alcaraz erawh a la ṭawng fimkhur hle, amah aia ranking sang leh tawnhriat nei ṭha, hlawhtlinna tam tak lo chang tawh an awm thu a sawi ve thung.