Miami GP-ah Verstappen a chak ber

Pathianni zana tlan zawh tak Miami Grand Prix-ah Max Verstappen chuan harsa takin hnehna a chang. Red Bull driver hian championship lama a elpui Charles Leclerc a hneh a, nomawi inchuh boruak a sang chho zel dawn.

Intlansiak tawp dawnah Verstappen hi Leclerc chuan na takin a nawr, a bik takin lap hnuhnung pangaah an inum na hle. Dutch tlangval hian tun season kal laiah a vawi thum nan hnehna a chang, car engine chiang lo vanga tlan tluan theih loh vawi hnih a neih erawh a la tuar.

Chak hnem ber ni mah se Max hi championship table-ah chuan panhnihna a ni, hmahruaitu Leclerc nen an inkarah point 19 a la awm. Season tir chauh a la ni a, driver pahnih hi na takin an inel chhunzawm dawn tih a chiang.

Mercedes erawhin beisei an la phak thei lo. World champion vawi sarih ni tawh Lewis Hamilton chu paruknaah a thleng, a teammate George Russell chu a hma chiahah a thleng. Intlansiak vawi nga an neih tawhah Mercedes hian hnehna an la chang lo.

Hnehna changtu Verstappen chuan, "Zirtawpni khan ka car a chiang lo a, chuvang chuan practice-na hun pawh ka nei mumal thei lo. Harsatna siam fel a ni a, a nihna takah chuan intlansiak tir lamah khan rilru chu a nuam lo, a hnuah erawh buaina a thleng lo," a ti.