Ten Hag-a kaihhruai Ajax an vannei

Eredivisie-ah hmahruaitu Ajax leh pangana AZ Alkmaar chu 2-2 in an inhnehtawk a, Manchester United manager thar tur Erik Ten Hag hoten point hnih an hloh. Dutch champion nih tum inum boruak nung sawt mah se pahnihna PSV chu Feyenord-in 2-2 thoin an chelh. Ajax tan champion turin match hnih khelh hmabakah point thum hmuh chiah a ngai tawh.

AFAS Stadion-ah Ajax-in minute 42-naah Brian Brobbey hmangin goal khung hmasa mah se mikhual team AZ Alkmaar-in Vangelis Pavlidis (62') leh Hakon Evjen (75') te hmangin an lehthal. Ten Hag hoten tlawm an duh lo a, minute 86-naah Edson Alavarez hmangin siphurh an sut zo.

PSV-in hun ṭha hman ṭangkai ngei tumin De Kuip-ah darkar chanve chhunga Cody Gakpo goal hmangin 2-0 in hma an hruai. Amaherawhchu mualneitu Feyenoord tan striker Cyriel Dessers-a'n minute 86-naa siphurh a sut ṭhen hnuah injury time minute ruknaah penalty hmangin a khung belh.

Ajax hian May 11, Nilaini zan hian Heerenveen an mikhual ang a, hnehna an chang a nih chuan an champion ang. Ten Hag-a'n Ajax a enkawl hnuah pakhatna a la nihpui vek a, chutihrualin kum 2020 khan Covid-19 vanga inelna khelh zawh a nih loh avangin champion-a puan an ni lo. Tun season hi Ten Hag hnuaia league-a vawi thum an champion-na tur a ni ang.