Barca-in La Liga aṭangin Espanyol an mangṭha

Barcelona-in La Liga-a an champion beiseina chhi nung turin Espanyol chu Catalan derby-ah 1-0 in an hneh a, an hmelma club hi Spanish top flight aṭangin an tla chiang ta bawk. 

La Liga nomawi humhim tum Barcelona tan Luis Suarez chuan inkhela goal awmchhun hi a khung a, La Liga-a inhamtan tum Espanyol-in a chhanletna tur an nei lo. Espanyol hian match thum khelh tur la awmah 17-na Eibar chu point 11-in an phak lo a, inhamtan ngaihna a awm tawh lo. 

Catalan derby boruak 'hot'-ah red card vawi hnih phawrh a ni a, Barca rawlthar thisen lum Ansu Fati chu hnawhchhuah a ni a, a hnu lawkah Espanyol midfielder Pol Lozano chu hnawhchhuah a ni bawk - referee chuan VAR a rawn ve ve.

Barcelona hian hnehna an chan avangin hmahruaitu Real Madrid chu point khatin an hnaih leh ta sawt a, match khatin an khel tam thung. Real hian zanin dar 1:30-ah Alaves an mikhual dawn a, hnehna an chan chuan point liin Barca an tlansan leh ang. 

Red card 

Nou Camp-a inkhelah goal aiin red card kan hmu hmasa zawk. Barca rawlthar Fati chu Fernando Calero laka a foul dan hlauhawm tak avangin hnawhchhuah a ni a, Espanyol-in an tan kawng a inhawngah an ngai. 

Mahse, hun tam a liam hmain Pol Lozano chuan attthlak takin Gerard Pique a tlawh a, minute 53-naah red card a hmu ve zui - Barca tan vanneihna a ni a, Lozano hnawhchhuah a nih ṭanga minute thumnaah Suarez chuan goal a khung. Espanyol hian first half tawp hmain hmahruaina goal khungna remchang nei mah se Barca keeper Marc-Andre ter Stegen chuan a hna ṭha takin a thawk a, Clement Lenglet-a 'own goal' ni thei chu a dang a, Didac Vila chuan post a tih per bawk. 

Hetihlai hian Espanyol keeper Diego Lopez chuan Lionel Messi goal khung theihna remchang chu a dansak ve bawk a, a tawpah chak phu zawk Barca an chak. 

Liverpool striker hlui Suarez-a'n tun season inelna hrang hranga match 31-a khelha a goal 18-na a khung a, Barca tan match 278-a goal 195 a khungna a ni nghal. 

Suarez hian Barca tana goal khung tam lamah Cesar Rodriguez Alvarez (232) leh Lionel Messi (630) chiah phak loin a hming chu 'top three' huangah a ziak kai ve ta a, Catalan club chanchinah theihnghilh a ni tawh lo ang. 

Uruguayan striker hian kum 2014 khan Liverpool tan match 133-a goal 82-a khung hnuin Barcelona hi a pan a, Barca tana a mimal season ṭha ber chu 2015-16 season khan hmangin match 53-ah goal 59 a khung! Barcelona a pan hnuah season khata goal 25 khung tlin loh a la nei ngai lo a, tun season La Liga bikah match 25 khelin goal 15 a khung tling ta bawk. 

La Liga inkhel dangah season thara Champions League khelh beisei Villarreal chuan an beiseina chhi nung turin an elpui Getafe chu 3-1 in an hneh a, Santi Cazorla chuan penalty aṭangin goal hnih a khung.

Cazorla hian minute 66-naah penalty aṭangin a khung zet a, Getafe hian kum 20 mi striker Hugo Duro hmangin minute 80-naah an chhanglet. Mahse, a la tawp lo - Villarreal hian minute 86-naah penalty an hmu leh a, Cazorla bawkin goal-ah a chantir. 

Hun pek belh minute thumnaah Ruben Pena chuan an goal thumna a khung leh a, Getafe-in an chhanglet dawn lo tih a chiang tawh - hun a tawp a, 3-1 in Villarreal an chak. Getafe-in penalty vawi hnih an hmuh an hrethiam lo a, inkhelh hamrik a tawp rualin buaina a chhuak - Vicente Iborra (Villarreal) chu red card pek a ni a, Getafe player zingah Allan-Romeo Nyom, Xabier Etxeita leh Damian Suarez ten red card an hmu bawk. 

July 8, Nilaini

Getafe    1 - 3    Villarreal

GET : Hugo Duro 80'

VIL : Santi Cazorla 66' (P), 86' (P); 

   Ruben Pena 90+3'

Real Betis    3 - 0    Osasuna

BET : Guido Rodriguez 4'; 

   Alfonso Pedraza 25'; 

   Carles Alena 90+7'

Barcelona    1 - 0    Espanyol

BAR : Luis Suarez 56'