Simona Halep a hlauthawng

Wimbledon champion Simona Halep chuan a hma thei ang bera tennis khelh a châk tawh thu a sawi a, chutih rualin US Open khel tur erawh chuan tun dinhmunah a la hlauhthawn thu a sawi chhuak.

Covid-19 vangin March thla hnu lamah tennis inelna a la awm lo. Wimbledon ṭhulh a nih vangin Halep hian title kawl lai a hum zui a, season kal laia Grand Slam pahnihna turin August 31 aṭang hian US Open chu khelh tum a ni.

World number 2 Halep chuan, "A harsa dawn, ruahmanna an neih dan leh inkaihhruaina an siam dan a zir a ni ang," tiin US Open chungchanga zawhna a chhang. Mipa champion lai Rafael Nadal pawh a dinhmun a chiang rih lo.

Romanian nula chuan sawi zawmin, "Thla tharah hian eng nge lo thleng dawn tih kan la hre lo, thutlukna siam tur chuan nghah rih a ngai. Player dangte ngaihdan pawh hriat hmasak a pawimawh ve bawk ang," a ti.

US Open bakah hian French Open chu September thla chawhnu lamah khelh tum a ni a, inkhel loin thla thum chuang an awm tawh avangin player tam zawk chu tournament khelh tur thlan chungchangah an rilru a phir deuh dawn niin a lang.