Champion lai Novak Djokovic a tla
Australian Open chanchina result mi barakhaih ber pakhat chu nimin khan a thleng! Champion lai Novak Djokovic chu second round-ah vuak tlak a ni - Serbian thiampuipa hi world number 117 Denis Istomin nen darkar li leh minute 48 chhung zet an inbeih hnuah 7-6(8), 5-7, 2-6, 7-6(5), 6-4 in a tlawm.
Rod Laver Arena-a inkhelah world number 2 Djokovic-a'n nidanga a game ṭha tak ang kha a lantir thei lo. A service aṭanga a game hmasa ber la tur pawhin minute 15 a nghah thlen a ngai a, wildcard hmanga inlan Istomin nen hian set hmasa ber inchuhin darkar khat leh minute 25 zet an in nuai!
Grand Slam vawi 12 champion tawh Djokovic hian set hnihna a lak hnuah set thumna la turin a zawnin game li a la thei a, nuamsa taka chak chho thei tura ngaih a ni hman. Mahse, beisei angin thil a kal lo, set lina a hloh hnuah set hnuhnung berah a service vawi khat a hum zo lo a, a tawp thlengin a tho chhuak thei tawh lo.
A na...
Australian Open nomawi vawi ruk chawi tawh Djokovic hian kum 2008 khan Wimbledon second round-ah Marat Safin hneh loin a lo tla tawh a, hemu hnuah tun ṭum hi major tournament-a a tlak hma leh ber ṭum a ni hial. Vawi ruk champion ve tawh Roy Stanley Emerson kalsana ropui ber nih a tumna kawng a tawp ta rih.
Kum 29-a upa Djokovic hi player ranking hniam zawk lakah a chak lo khat hle, tun hnai kum sarih chhungin world number 100 hnuai lam lakah vawi hnih a chak lohna a ni a, a hneh loh pakhat chu Rio Olympic first round-a a ngam loh Juan Martin del Potro (145) a ni.
A mak!
Uzbekistan tlangval Istomin chuan hnehna a chan hnuah, "Keimah ngei pawhin mak ka ti. Tennis ka khelh ve tawh chinah chuan tun ṭum hi hnehna ka chan ropui ber a la ni hial a, ka tan chuan a hlu takzet," a ti.
Istomin hi kum 2001 khan car accident-naah a ke a lo hliam tawh a, thla thum chhung damdawi-inah dah niin kum hnih chhung a inkhel thei lo zui bawk. Grand Slam inelna huangah chuan Wimbledon leh US Open-ah last 16 a lo lut ve tawh a, tun hmain Djokovic nen hian vawi nga an inhamchhawn tawh a, hengah te hian set a la ngai lo.
Kum 30-a upa Istomin tan tun ṭum hi Australian Open third round vawi thum a luhna chiah a ni a, Kyle Edmund hnehtu seeded 30-na Pablo Carreno Busta nen an inhamchhawn leh ang.
Djokovic chuan, "Denis khan a khel ṭha a, a service a nat bakah na takin min nawr thei reng a, chak a phu. Second round-a tawp mai tur hian ka inngai bik lo a, tunah chuan ka tihsual ennawnna hun a ni," a ti.
Inkhel dang
World number 1 Andy Murray chuan third round lut turin kum 19-a upa Andrey Rublev lakah harsatna a tawk lo. Britain tlangval hian Nilaini tlai khan darkar khat leh minute 37 chhungin 6-3, 6-0, 6-2 in hnehna a chang.
Kum 29-a upa Murray hian Australian Open final vawi nga a khel tawh a, a la champion lo. Final a luh ṭum hian Djokovic lakah a chak lo vek. Second round-a khingpui world number 152 tan erawh tun ṭum hi Grand Slam tournament a vawi hnih khelh vena chiah a ni.
Second round inkhel dangah nikum Wimbledon finalist Milos Raonic chuan Gilles Muller lakah 6-3, 6-4, 7-6(4) in hnehna a chang. Seeded pathumna Raonic hian ṭum dang ang bawkin a service ṭhat a hmang ṭangkai leh hle a, vawi 21 ngawt aces a siam.