East Bengal fapa rangkachak Didika

I League nomawi chawi tum East Bengal chuan Nilaini zan khan Churchill Brothers chu 2-0 in an hneh - Kolkata club tan Thongkhosiem Haokip-a'n (Semboi) goal hmahruai a khung hnuah captain Lalrindika Ralte chuan corner aṭangin an goal hnihna a pet lut a, 'Hero of the Match'-ah thlan a ni.

Lunglei tlangval hian khual­muala DSK Shivajians an hneh ṭumin chakna goal a assist tawh bawk a, tun season-a I League match hnih a khelh tawhah Didika'n captain armband hreng chungin player thiam bik a nihzia a pholang - Trevor Morgan-a naute hian champion an tum a nih chuan Mizo tlangval chet ṭhat hi an tan a pawimawh ang.

Didika thawhlehna!
Kum 2015-ah hliam vangin Mizo tlangval Didika a talbuai a, ISL-ah pawh a club Mumbai City tan a inlan thei lo. Nikum Calcutta Football League khelh dawnah Didika'n ngai awh chho ṭanin East Bengal chu CFL nomawi a chawipui nghal a, ISL-ah Atletico de Kolkata tan a khel bawk.

I League ṭan a ni a, East Bengal match hmasa berah Lunglei tlangval hian Aizawl FC hmachhawn thei lo mah se DSK Shivajians a hmachhawn a, assist a nei nghal. Didika'n a professio­nal zinkawng a zawh ṭanna Churchill Brothers lakah pawh ṭhat chhuah duh loin goal a khung chhunzawm a, Didika a tho leh ta!

Didika chuan, "Hliam vangin hun rei tak inkhel thei loin ka awm a, pangngai taka inkhel tura lo kir leh tur hian taksa thawhrimna piah lamah rilru huaisen neih a ngai a ni. Theihtawp chhuahin ka bei a, ka thawkrim takzet a, kawng engkimah ka insum a, tunah chuan ngai ka awh leh ṭan ta," tiin Vanglaini palai hnenah a sawi a, a hlim hle.

A bu ang thlap
Didika'n corner aṭangin goal a khung a, kum 2011-a India senior team tana a match hmasa ber kheltu hian an goal khung dan chu an zir ang thlap a nih thu Vanglaini palai a hrilh.

Didika chuan, "Coach ruahman dan ang chuan kan defender palian Ivan Bukenya khan keeper a lo tibuai ang a, keiin corner aṭangin goal-ah khung ka tum ang. Training-naa kan zir angin ka pet a, a goal ta a ni," a ti.

Didika chuan champion tur chuan hmabak an la ngah thu sawi nghalin, "Bengaluru leh Mohun Bagan hi team ṭha tak an ni a, lo khelho rei tawh an nih bawk avangin an inman em em a, team hmangaihna tak tak thinlung an pu bawk. Kei ni chu player thar kan inla nasa a, team ropuina aia mimal thawh ṭhat ngai pawimawh an la tam avangin kan kawng hi a hautak lehzual a ni," tiin a sawi.

Mizo aiah Mizo!
Didika'n tun season-a league match hnih a khelh tawhah captain armband a la hreng ve ve a, Kolkata club tana captain a nih chhan chu Robert Lalthlamuana inhliam vang a nih thu a sawi.

East Bengal midfielder Didika chuan, "East Bengal-ah chuan club tana khel rei tawh apiang hi captain an ni mai ṭhin a, tun hnaiah Robert-a a inhliam avangin captain armband hi ka hreng a ni," tiin Vanglaini palai a hrilh.

East Bengal-ah Didika bakah Mizo pahnih Robert leh David Lalrinmuana te an awm a, Goa-ah an zin ve lo.

Red & Yellow Brigade hian lea­gue match thum an khelh tawhah Aizawl FC an inhnehtawkpui tih loh chu hnehna an la chang ve ve a, January 22-ah vawi thum khelha chak vek Bengaluru an mikhual ang.