Season tawpa chawl tur Alonso
Xabi Alonso chuan tun season rawp rualin inkhelh a chawlhsan dawn. Spain international hlui hian season tawp thleng Bayern Munich tan contract a la nei a, thlasik chawlh an hman zawh hnuah Bundesliga champion hotute nen inbiakna neiin June-ah a boot a khai tur thu a sawi.
Kum 35-a upa Alonso hian German club tan hian match 97 a khel tawh a, league nomawi vawi hnih a chawi tawh. A vanglaiin Liverpool leh Real Madrid chu Champions League-ah a champion pui a, Spanish club tan hian La Liga title a la bawk.
Spain tana match 114 kheltu Alonso hian ram leh club tan nomawi 16 a chawi a, heng zinga langsar chu 2010 World Cup bakah 2008 leh 2012 European championship-a an champion te kha a ni.
Germany-a thuthar thehdarhtute chuan Alonso thutlukna hi club lamin an pawm rualin contract thar a ziak duh a nih chuan an inhawng reng niin an sawi. Bayern captain Philipp Lahm pawh season tawp ruala chawl tura sawi a ni a, hetihlai hian Germany captain hlui hian a thutlukna a sawi lo thung.