Liverpool chakna Lucas Leiva

Lucas Leiva-a'n Liverpool tana goal a khung hnuhnung ber chu kum sarih liam ta kha a ni a, Nilaini zan khan a chhunzawm leh chiah! Brazilian midfielder hian FA Cup third round replay-ah Reds tan goal awmchhun a khung a, League Two club Plymouth lakah 1-0 a hnehna changin Reds-in an FA Cup zinkawng an zawh chhunzawm zel.

Jurgen Klopp-a nauten Anfield-ah rin loh taka Plymouth hi an lo inhnehtawkpui tawh avangin Premier League fixture chep tak karah an zin chhuah a ngaih phah a, an tha sen a thlawn mai loh nan Lucas hian minute 18-na lekah Philippe Coutinho corner pet chu ṭha takin a tauh lut a ni.

Liverpool hian January 28-ah FA Cup fourth round khel turin Championship club Wolverhampton Wanderers an mikhual ang.

Goal nen Lucas

Kum 2007-a Liverpool a zawm hnuah Lucas-a'n match 328 a khelh sak tawh a, a goal khung zat erawh goal sarih chauh a ni. Plymouth laka goal a khung hmaa a goal khung hnuhnun ber chu September 2010 daih tawh khan a ni a, Europa League-a Steaua Bucharest 4-1 a an sawp ṭumin a khung - ni 2,316 hnuah Reds tan goal a khung ve leh ta!

Brazil tana vawi 24 inlan tawh midfielder hian Reds tana goal a khung hnuhnung berah hian Roy Hodgson chu Liverpool coach a la ni a, Lucas-a captain na hnuaia Plymouth hmachhawn zinga mi Ben Woodburn chu hetihlai hian kum 10-a upa chauh a la ni bawk.

Liverpool goal neihchhun khung tura mawi taka tauh luttu Lucas chuan, "Ka goal khung loh hun chhung chu rei in lo ti viau a ni maw? Kar hmasa lawk pawh khan training-naah ka khung reng alawm," tiin fiamthu a thawh zui.

Klopp pawhin, "Training-naah te chuan top scorer alawm a nih ṭhin. Football-ah chuan hei hi a nuam lai ber chu a ni a, tupawhin harsatna an thlen thei reng a ni," tiin a sawi sawi zui bawk.

Klopp-a chesual lo

Liverpool boss Jurgen Klopp-a'n Plymouth an mikhual ṭumin an club chanchina starting eleven naupang ber a luhtir a, tawnhriat ngah lo player rualin an mikhual an inhnehtawkpui avangin an zin chhuah a ṭul phah. Klopp-a'n a player rem dan avangin sawisel hlawh mah se Manchester United nena inhnehtawk hlim an nih avangin Old Trafford-a inkhel hah lo player tam zawk a ring nawn a, a tisual lo.

Reds hi goal khat aia tam zawk khung thei an ni a, amaherawhchu Yann Songo'o-a'n penalty area-a Alberto Moreno a tih tluk avanga a penalty chawi chu December 14 hnua goal khung leh tawh lo Divock Origi chuan goal-ah a chantir thei lo a, Belgian striker penalty pet chhe tak hi Plymouth keeper Luke McCormick tan nuamsa taka dan theih a ni.

Hetihrual hian Premier League table aṭanga chhiara hmun 66-a hniam zawk Plymouth hi thaibo ngawt theih an ni bik lo a, Jake Jervis chuan second half-ah scissor kick hmangin post a pet per a, Reds an vannei hle.

Eng nge an sawi?

Liverpool coach Klopp chuan, "Ka naute khelh danah ka lawm a, an theihna hi ka hrechiang em em a ni. Hma an sawn zel theih nan theihtawp kan chhuah ang a, chutihrual chuan anni pawhin thawh tur an nei tih an hriatve a ṭul bawk ang," tiin a naute khelh dana a lawm thu a sawi.

Plymouth manager Derek Adams chuan, "Liverpool kha a chang chuan kan nawr em em a, inkhel pumpui thlirin kan khel ṭha thawkhatah ka ngai. Liverpool nen match hnih kan khel a, goal khat chiah kan chhuah a ni," tiin a naute khelh dan a chhuang hle.

Inkhel dang

Nilaini zan FA Cup inkhel dangah Southampton chuan injury time-a Shane Long goal khung hmangin Norwich City chu 1-0 in an hneh a, tun season-a League Cup quarterfinal-a an lo hnawhchhuah tawh Arsenal chu fourth round khel turin January 28 zanah an mikhual ang.

Rafael Benitez enkawl New­castle United pawhin FA Cup-a an zinkawng chhunzawm zel turin Birmingham City chu 3-1 in an hneh a, Magpies tan Matt Ritchie-a'n goal hnih a khung bakah Yoan Gouffran-a'n goal khat a khung ve bawk avangin Birmingham tana David Cotterill khung chu awmze nei lo mai a ni.

Birmingham manager Gian­franco Zola chu kum 1889 hnua Birmingham coach zinga an match hmasa pasariha tlawm vek awmchhun a ni nghal bawk.

FA Cup Fourth Round Fixtures
January 27, Zirtawpni Zan
Derby County 1:25 AM Leicester City
January 28, Inrinni
Liverpool 6:00 PM Wolverhampton
Tottenham Hotspur 8:30 PM Wycombe Wanderers
Oxford United 8:30 PM Newcastle United
Lincoln City 8:30 PM Brighton & Hove Albion
Chelsea 8:30 PM Brentford
Rochdale 8:30 PM Huddersfield Town
Burnley 8:30 PM Bristol City
Blackburn Rovers 8:30 PM Blackpool
Middlesbrough 8:30 PM Accrington Stanley
Crystal Palace 8:30 PM Manchester City
Southampton 11:00 PM Arsenal
January 29, Pathianni
Millwall 5:30 PM Watford
Fulham 6:00 PM Hull City
Sutton United 7:30 PM Leeds United
Manchester United 9:30 PM Wigan Athletic