NM Gupta Football khel tur Mizoram

San­tosh Trophy final round atana inpuahchah nan Mizoram team chu 31st Captain NM Gupta Trophy Football Tournament khel turin an zin dawn a, vawiin hian Silchar-a inkhel turin Aizawl an chhuahsan ang.

India ram pum huap pawha knockout football inelna ngaihhlut ni phak NM Gupta Football hi January 21 - February 4 chhungin Satindra Mohan Dev Stadium, Silchar-ah khelh tur a ni.

Mizoram hi champion tura rinkai zingah tel pha mah se ARC (Shillong), ASC Cen­­tre (Bangalore), Assam Rifles (Shillong), Army Green, BSF, Sylhet DSA (Bangaldesh), TRAU (Manipur), ASEB (Guwahati) leh Arunachal SS (Silchar) te an tel ve dawn avangin awlsama taka nomawi chawi theih a ni lo ang.

Tun ṭumah hian Mizo­ram manager hi Peter Lal­zawm­liana a ni dawn a, ani hi MFA Women's Committee Secretary nilai a ni. Coaching staff dang erawh a ngai niin coach Lalsangzuala Hmar pui turin Anand Gurung (asst coach) leh Ramtharzuala (physio) te an zin tel bawk ang.

Mizoram coach chuan, "Tun ṭuma inelna hi team leh player tan a pawimawh. Nomawi chawi ngei kan duh a, player tan chuan Santosh Trophy final round-a starting eleven-a tel tur zawnna a ni nghal ang," tiin Vanglaini palai a hrilh.