Radwanska ngam loh Baroni

World number 3 Ag­nieszka Radwanska chu Mirjana Lucic-Baroni lakah 6-3, 6-2 a chak loin nimin tlai khan Australian Open second round aṭang­­in hnawh chhuah a ni.

Melbourne Park-a inkhelah a bul aṭangin kum 34-a upa Baroni chuan na takin a nawr nghal a, game li naah seeded pa­thumna Radwanska service chhuhsakin set a la zui. Set hnuhnung zawkah Radwanska hian game hmasa pahnih lain bul ṭan ṭha viau mah se game dang a lak belh theih tawh miau loh avangin a chak lo.

Croatia nula Baroni tan tun ṭum hi kum 1998 hnua Australian Open second round a kal pelh lehna hmasa ber a ni a, hetihlai hian Radwanska tan erawh he inelna bikah chuan kum 2009 hnua a tlak hma ber ṭum a ni thung.

Baroni chuan, "Hneh­na ka chan lohna a rei tawh a, lung a leng hman. Point hnuhnung ber ka hmuh hma kha chuan keimah kha ka inringhlel zawk hial," tiin a sawi.