Bengaluru tan CK Vineeth
CK Vineeth-a'n tun hnaia a chet ṭhat chhawm nung zelin Nilaini zan khan Mumbai FC lakah hattrick-a siam a, Albert Roca enkawl team hian 3-0 in hnehna an chang. Kerala striker hian minute 45-naah Bangalore club tan hian goal hmahruai khungin chawlhlawk hman zawh a nih hnuah goal hnih a khung leh bawk a ni.
India tana vawi ruk inlan tawh striker hian Indian Super League khelh zawh takah khan match kua a khelhah goal nga a lo khung tawh a, ISL lama a 'puja' fuh laklawh hi I League lamah pawh chhawm zelin vawi thum inlanah goal li a khung tling ta.
Bengaluru tan Mizo player zingah inkhel bul ṭan an awm lo a, Malsawmzuala leh Daniel Lalhlimpuia te chu bench-ah awm mah se tlan luhtir an ni lo. January 22-a Aizawl FC mikhual tur Mumbai FC tan ṭum dang ang bawkin Lalchhawnkima'n inkhel bul ṭan mah se Champhai tlangval hi minute 21-naah hliam vanga lakchhuah a ni.
Chhawnkima chuan, "Ka hliam neihna hi ka malpui vei lam a ni a, Aizawl FC ka hmachhawn theih dawn leh dawn loh a la chiang lo. Vawiina MRI scan neih hunah ka hliam dinhmun tur chu a hriat chauh ang," tiin Vanglaini palai hnenah a sawi.